Daxili siyasət

Ana səhifə

Daxili siyasət

AXCP parlament seçkiləri ərəfəsindən başlayaraq Müsavat Partiyasının qərargahında fəaliyyət göstərir

07 yanvar 2011 14:12 (UTC +04:00)

Bakı-APA. Azərbaycan Xalq Cəbhəsi Partiyasının (AXCP) rəhbərliyi Müsavat Partiyasının qərargahında fəaliyyət göstərir. Bu barədə APA-ya Müsavat Partiyasının adının çəkilməsini istəməyən təmsilçilərindən biri məlumat verib. Belə ki, 7 noyabr 2010-cu ildə keçirilmiş parlament seçkisi ərəfəsində iki partiyanın “AXCP-Müsavat” seçki bloku yaratdıqdan sonra blokun seçki qərargahı Müsavatın qərargahında olub. Qərargahda hər iki partiyanın əməkdaşları çalışıb. Seçki prosesi başa çatdıqdan sonra da AXCP-nin sədri Əli Kərimli də daxil olmaqla partiya funksionerləri Müsavatın qərargahında fəaliyyət göstərməkdə davam edib. Partiyanın Rəyasət Heyətinin iclasları da burada keçirilir. “Həmişə olduğu kimi, qərargahın bütün kommunal xərclərini yenə də Müsavat Partiyası ödəyir. AXCP təmsilçiləri isə bir qəpik belə ödəmir. Əvəzində isə “Azadlıq” qəzetində və başqa kütləvi informasiya vasitələrində Müsavat Partiyasına qarşı kampaniya aparırlar” – deyə, partiya təmsilçisi bildirib.

Müsavat Partiyası Mərkəzi İcra Aparatının rəhbəri Arif Hacılı APA-ya açıqlamasında bildirib ki, hələ AXCP və “Azadlıq” qəzeti Xəqani, 33 ünvanındakı binadan çıxarılandan dərhal sonra Müsavat Partiyası AXCP-yə bu partiyanın qərargahında fəaliyyət göstərmək üçün şərait göstərməyə hazır olduğunu deyib: “Həmin vaxt onlar bizim təklifimizə görə təşəkkür də etmiş və hələlik qərargahın otaqlarından istifadə etmək niyyətində olmadıqlarını bildirmişdilər. Ancaq 7 noyabr seçkilərindən əvvəl - “AXCP-Müsavat” seçki bloku yaranan zaman birgə qərargahın Müsavat Partiyasının qərargahında yerləşməsi qərara alındı. Bu məqsədlə qərargahımızda AXCP-nin seçki ilə məşğul olan əməkdaşlarına çalışmaq üçün imkan yaradıldı. Həmin imkandan bu gün də AXCP-nin nümayəndələri istifadə edir”. A. Hacılı kommunal xərclərin hansı prinsiplərlə ödəndiyi barədə danışmaq istəmədiyini deyib.

O, AXCP funksionerlərinin və “Azadlıq” qəzetinin onlara qarşı kampaniya aparmasına da toxunub: “Mən qəzetlə təşkilatı eyniləşdirmək istəməzdim. Ancaq təbii ki, “Azadlıq” qəzeti AXCP-nin siyasətini dəstəkləyən mətbuat orqanıdır. Nəzərə alsaq ki, bu gün AXCP-nin Müsavat Partiyası ilə kifayət qədər yaxın müttəfiqlik münasibətləri var, istər AXCP funksionerləri tərəfindən, istərsə də “Azadlıq” qəzetinin əməkdaşları tərəfindən Müsavat Partiyasına qarşı hansısa kampaniya aparılması müttəfiqlik münasibətlərinə xələl gətirir. Bu, həm də demokratik qüvvələrin, o cümlədən AXCP-nin zərərinədir. Ona görə də müttəfiqlik münasibətlərinin həqiqi müttəfiqlik münasibətləri kimi olması hər iki təşkilatın və bütövlükdə cəmiyyətin xeyrinədir”.

AXCP sədrinin müavini Fuad Qəhrəmanlı isə APA-ya deyib ki, həqiqətən də seçkilər ərəfəsindən başlayaraq Müsavat Partiyasının qərargahında fəaliyyət göstərməyə başlayıb: “Seçki bitdikdən sonra da partiyalar arasında müttəfiqlik münasibətləri davam edib. Bu münasibətlər kontekstində biz də Müsavat Partiyasının bizim üçün ayırdığı yerdə Rəyasət Heyəti iclaslarının keçirilməsi üçün istifadə etmişik. Biz buna görə Müsavat Partiyasına təşəkkür edirik. Çünki orada olduğumuz müddətdə həmişə müsavatçılardan xoş münasibət görmüşük”.

F. Qəhrəmanlı onu da deyib ki, nə AXCP funksionerləri, nə də “Azadlıq” qəzeti tərəfindən Müsavat Partiyasına qarşı heç bir kampaniya aparılmır: “Necə kampaniya aparıla bilər ki, biz Müsavat Partiyası ilə birləşməklə bağlı qərar qəbul etmişik?! Bizim bütün addımlarımız, yanaşmalarımız münasibətlərin daha səmimiləşməsinə, istiləşməsinə yönəlib. Belə bir fikirlərin səsləndirilməsi anlaşılmazlıq üzündən meydana çıxıb”.