Daxili siyasət

Ana səhifə

Daxili siyasət

Adil Qeybulla: “Bizim səsləndirdiyimiz sərt bəyanatları bu gün Müsavat rəhbərliyində oturmuş bəzi adamlar verə bilməzlər”

08 yanvar 2011 12:42 (UTC +04:00)

Yazıda göstərilənlər tam absurddur və reallıqla heç bir əlaqəsi yoxdur. Bu, jurnalist fantaziyasıdır və məqalə qərəz elementlərindən də uzaq deyil”. Bunu APA-ya açıqlamasında Müsavat Partiyası Divanının sabiq üzvü, professor Adil Qeybulla deyib.

O, Qabil Hüseynli ilə partiyadan çıxarkən bəyanat verdiklərini, onlardan əvvəl də Sülhəddin Əkbər və İbrahim İbrahimlinin də sərt bəyanatla çıxış etdiyini xatırladıb: “Halbuki həmin bəyanatları bu gün partiyanın rəhbərliyində oturmuş bəzi adamlar verə bilməzlər. Necə olur ki, biz hakimiyyətin sifarişi ilə ayrılırıq və bu cür sərt bəyanat veririk?! İkincisi, bizim bəyanat bir qədər mötədil görünə bilər. Ancaq mahiyyət etibarilə biz müsavatçılıq xəttində qaldığımızı bəyan eləmişik. Sadəcə, partiya bir qrupdur, bir partiya maraqları var, biz onlarla uzlaşmadıq, ona görə də kənarda fəaliyyət göstərmək qərarına gəldik. Onlar düşünürlərsə ki, özlərinin partiyasından kənarda fəaliyyət yoxdur, bu, yanlış təsəvvürdür. Hesab edirəm ki, bu cür yazılar əslində heç də yaxşı məqsədlərə xidmət etmir”.

A.Qeybulla “Müsavatdan səs-küylü istefaların müdhiş pərdəarxası” yazısı ilə bağlı “Yeni Müsavat” qəzetinin sahibi Rauf Arifoğlu ilə söhbət etməyə ehtiyac görmədiyini də deyib. Qeyd edək ki, sözügedən yazının başlığı altında Sülhəddin Əkbər, İbrahim İbrahimli, Qabil Hüseynli və Adil Qeybullanın fotoları verilib. Yazıda onlardan heç birinin adı çəkilməsə də, Müsavat Partiyasından istefaların hakimiyyətin istəyi və sifarişi ilə baş tutduğu iddia olunur.

Xatırladaq ki, Sülhəddin Əkbər və İbrahim İbrahimli 2010-cu il noyabr ayında, Qabil Hüseynli və Adil Qeybulla isə bu il yanvarın 4-də partiyadan istefa verib.