Daxili siyasət

Ana səhifə

Daxili siyasət

Əhməd Oruc Pənah Hüseyni qeyri-ciddi siyasi fəaliyyətdə ittiham edib

11 yanvar 2011 10:57 (UTC +04:00)

Bakı. Ramil Məmmədli-APA. Azadlıq Partiyasının sədri Əhməd Oruc Demokratiya Uğrunda İttifaqda (DUİ) baş verən proseslər və İctimai Palata ilə bağlı açıqlama yayıb.

Ə. Oruc APA-ya açıqlamasında sabiq deputat Pənah Hüseyni qeyri-ciddi siyasi fəaliyyətdə ittiham edib. Açıqlamada bildirilir ki, 2010-cu il noyabrın 7-də keçirilən parlament seçkilərindən dərhal sonra noyabrın 10-da heç bir ciddi əsas olmadan P. Hüseyn DUİ-nin yığıncağında Azərbaycan Xalq Partiyasının bu birlikdən çıxdığını bəyan edib, bir neçə gündən sonra mətbuatda DUİ-dən çıxmadıqlarını bildirib: “AXP-nin DUİ-yə qayıtmasına qarşı əsas arqument isə Pənah Hüseynin yığıncaqlarda özünü normal apara bilməməsi, bütün təkliflərin əleyhinə olması, qalmaqal salması, bir sözlə birliyin normal fəaliyyətinə mane olması ilə bağlı idi. Əvvəlcə Xalq Partiyası danışıqlarda iştirak etdi, sonradan danışıqlardan çıxdı, sonra qayıtdı və sairə. Yenidən DUİ-yə qayıda bilməyən Pənah Hüseynin bu məsələdə əsas “günahkar” məni hesab etdiyinə görə, mənə qarşı aqressiv münasibəti başa düşüləndir.

“Miskin vəziyyətdə olan, normal düşüncəsini itirmiş bir neçə partiya və QHT-lərlə qısa müddət ərzində, alternativ parlament, xalq məclisi, senat, super birlik, ictimai palata yaradacaqları ilə bağlı açıqlamalar veriblər, sonda isə bir neçə QHT ilə birlikdə yeni QHT yaradıblar. Bundan sonra İctimai Palatanı yaradanlar DUİ-yə daxil olan partiyaların sədrləri, funksionerləri ilə müntəzəm görüşlər keçirərək şirnikləndirici təkliflərlə çıxış edir, DUİ daxilində gərginlik yaratmaq üçün bütün vasitələrdən istifadə edirlər”.

Ə. Oruc İctimai Palata təsisçilərini 20 il ərzində uğursuz müxalifətçilikdə də ittiham edib: “Bu şəxslərin düşdüyü vəziyyətə görə təəssüflərimi bildirir, həmin şəxslərin heç olmazsa həyatlarının qalan hissəsini normal insan kimi yaşamaları üçün tanrıya dualar etdiyimi bildirirəm”.

Pənah Hüseyn isə APA-ya deyib ki, Ə. Orucun açıqlamaları onu maraqlandırmır: “Sözün doğrusu, Əhməd Oruc məsələsi məni maraqlandırmır. Hər bir halda isə açıqlama ilə tanış olmadığıma görə, bir şey deyə bilmərəm”.