Daxili siyasət

Ana səhifə

Daxili siyasət

Müxalifət partiyalarının yaratdığı İctimai Palatanın I sessiyası keçirilib

29 yanvar 2011 13:46 (UTC +04:00)

Bakı. Pərvin Abbasov - APA. Bu gün Müsavat Partiyasının qərargahında İctimai Palatanın (İP) I sessiyası keçirilib.

APA-nın məlumatına görə, sessiyaya İP-nin Koordinasiya Şurasının (KŞ) üzvü, Müsavat Məclisinin rəhbəri Aqil Səmədbəyli sədrlik edib.

Gündəlik təsdiqləndikdən sonra iclas başlayıb. KŞ üzvü, Müsavat Partiyasının başqanı İsa Qəmbər bildirib ki, İP-nin iclasının daha geniş zalda keçirilməsi üçün rəsmi qurumlara müraciət olunsa da, mənfi cavab verilib.

KŞ üzvü, AXCP sədri Əli Kərimli ölkənin bölgələrində İP-nin təşkilatlarının yaradılması təklifini irəli sürüb. İclasda digər bir sıra təkliflər, o cümlədən mitinq keçirilməsi təklifi irəli sürülüb. Həmçinin təklif olunub ki, İP-nin bir neçə komissiyası yaradılsın. Həmin komissiyaların əksəriyyətinin adı Milli Məclisin hazırkı komitələrinin adları ilə eynidir.

İclasda qeyd olunub ki, hazırda İP-nin 189 üzvü var. 16 nəfərin İP üzvlüyünə namizədliyi irəli sürülüb. Namizədliyi irəli sürülənlər arasında MSK-nın keçmiş üzvü Ənvər Əliyev, hərbi ekspertlər İldırım Məmmədov, Üzeyir Cəfərov və publisist Mehriban Vəzirin də adları olub. Lakin həmin şəxslər toplantıda iştirak etmədiyindən, onlar İP-nin üzvlüyünə qəbul edilməyib. Ümumilikdə İP-nin üzvlüyünə 6 nəfər qəbul edilib.

İclasda İP-nin 2011-ci il üçün Fəaliyyət Planı, “Xocalı soyqırımı haqqında” qanun layihəsi qəbul olunub.

İP üzvləri yanvarın 31-də Məhəmməd Əmin Rəsulzadənin Novxanıdakı abidəsini ziyarət edəcək.

Qeyd edək ki, İP-nin növbəti iclası fevralın 26-da keçiriləcək.

İctimai Palata 2010-cu il dekabrın 28-də təsis olunub. İctimai Palatanın 9 nəfərdən ibarət Koordinasiya Şurasının üzvlərinin yarısı siyasi partiyaların (İsa Qəmbər, Əli Kərimli, Yusif Bağırzadə, Pənah Hüseyn), yarısı vətəndaş cəmiyyətinin (Mirvari Qəhrəmanlı, Aqil Səmədbəyli, Ənnağı Hacıbəyli, Vidadi Mirkamal, Hacı İlqar İbrahimoğlu) təmsilçiləridir.