Daxili siyasət

Ana səhifə

Daxili siyasət

Fuad Qəhrəmanlı: “Sülhəddin Əkbərin son açıqlamasını təəssüflə qarşılayırıq”

31 yanvar 2011 13:38 (UTC +04:00)

Bakı. Pərvin Abbasov-APA. “Təbii ki, Sülhəddin Əkbərin axırıncı açıqlaması bizim tərəfimizdən təəssüflə qarşılanır. Çünki bizim gözləntimiz, yanaşmamız ondan ibarət olub ki, AXCP-də Azərbaycan cəmiyyətinin düşdüyü indiki durumu dəyişmək əsas götürüldüyü kimi, Müsavat Partiyası da prosesə eyni kriterilərlə yanaşır”. Bu açıqlamanı APA-ya AXCP sədrinin müavini Fuad Qəhrəmanlı verib. Onun sözlərinə görə, Müsavat Məclisinin sabiq sədri Sülhəddin Əkbərin açıqlamaları ortaya yeni nüanslar çıxarır: “Biz bundan çox təəssüflənirik. Hesab edirik ki, doğrudan da birləşmə prosesinin həm AXCP, həm də Müsavat Partiyası üçün faydalı olacağını nəzərə alaraq, Müsavatdakı dostlarımız da bundan sonrakı mərhələdə yaranmış zərurəti lazımınca qiymətləndirəcəklər. Mən istəməzdim ki, belə əhəmiyyətli proses kiminsə sədr olması baxımından qiymətləndirilsin. AXCP olaraq bizim mövqeyimiz həmişə ondan ibarət olub ki, bu tip məsələlər əgər birləşdirici qurultay olacaqsa, orada həll edilməlidir. Seçim imkanı da bu prosesdə iştirak edən partiya üzvlərinə verilməlidir. Bunu əvvəlcədən müəyyənləşdirmək həm partiya üzvlərinin iradəsinin nəzərə almamaq, həm də prosesə şəxsi ambisiyalar baxımından yanaşma olardı. Bu, həm də partiyanın ali orqanı olan qurultayının səlahiyyətinə müdaxilə etmək sayılardı”.

F. Qəhrəmanı bildirib ki, AXCP funksionerləri və partiya sədri Əli Kərimli tərəfindən birləşmiş partiyanın sədri olmaq barədə iddia irəli sürülməyib: “Biz bunu partiya üzvlərinin öhdəsinə buraxmışıq. Hesab edirik ki, demokratiya mövqeyindən çıxış etdiyini bəyan edən, demokratiya prinsiplərinə sadiq olduğunu bildirən hər kəs bu prinsipə hörmətlə yanaşmalıdır. İstərdik ki, hər kəs bu məsələyə belə yanaşsın. Daha “kimsə sədr olacaq” qorxusu ilə cəmiyyətin gözlədiyi prosesləri tormozlamasınlar, əngəlləməsinlər. Əks təqdirdə, cəmiyyət qarşısında hesabat verməli olacaq və atdığı addımların məsuliyyətini daşıyacaq. Destruktiv addımlar, birləşməyə xidmət etməyən mövqelər sonda ictimaiyyət tərəfindən mənfi qiymət alacaq”.

Qeyd edək ki, Müsavat Məclisinin sabiq sədri Sülhəddin Əkbər mətbuata açıqlamasında Müsavat Partiyasının rəhbərliyini AXCP və Müsavat partiyalarının birləşməsini istəməməkdə ittiham edib: “Müsavat Partiyasının rəhbərliyi birləşmənin baş tutacağı halda, hətta partiyanın adı Müsavat olsa belə, təşkilatın Əli Kərimlinin nəzarətinə keçəcəyindən ehtiyatlanır. Onlar Azərbaycanda bir xalq hərəkatının başlayacağı təqdirdə Müsavat Partiyasının real rəhbəri kimdirsə, onun önə çıxacağından ehtiyatlanırlar”.