Daxili siyasət

Ana səhifə

Daxili siyasət

Qüdrət Həsənquliyev: “İşğal olunmuş ərazilər haqqında qanunun qəbul edilməsinə ehtiyac var”

01 fevral 2011 11:07 (UTC +04:00)

Bakı. Rəşad Süleymanov – APA. ““Azərbaycanın işğal olunmuş əraziləri haqqında” qanunun qəbul edilməsinə ehtiyac var”. APA-nın məlumatına görə, bunu Milli Məclisdə çıxışında millət vəkili Qüdrət Həsənquliyev bildirib. “Məlumatlar var ki, hətta Azərbaycan torpaqlarının işğalında iştirak etmiş şəxslərin payçısı olduğu şirkətlər Azərbaycanda müxtəlif layihələrdə iştirak edir. Yaxud kimsə gedib ermənilərlə kontrakt bağlayır, sonra da Azərbaycanda iş görməyə gəlir. Bu qanunu qəbul edib belə məsələlərə ərazilərimiz azad olunana qədər qadağa qoymalıyıq”, - deyə o, söyləyib.

Q. Həsənquliyev hazırda üzərində müzakirələr aparılan amnistiya qanunu barədə də danışıb. O bildirib ki, amnistiya 5 ildən bir olmalıdır: “Tez-tez amnistiya və əfvlərin olması ölkədə cinayətkarlıqla mübarizə tədbirlərinə mənfi təsir göstərir. Hüquq-mühafizə orqanları tutur, biz buraxırıq. Bir soruşaq görək, cinayət törədənlərin neçə faizi əvvəllər həbsdə olanlardır? 80-85 faizi”.

Millət vəkili Qənirə Paşayeva isə şəhid ailələri və müharibə əlillərinin mənzil təminatı məsələsinə toxunub: “Bu gün Azərbaycanda çoxlu sayda şəhid ailəsi, müharibə əlili mənzillə təmin olunurlar. Amma qanunvericilikdən qaynaqlanaraq, bu gün bəzi məsələlər narahatlıq yaradır. Qarabağ müharibəsi əlilləri ev növbəsinə dayanırlar, ancaq növbəsinə az qalmış həmin əlil həyatdan köçürsə, onun ailəsi o imtiyazdan yararlana bilmir. Dövlətimizin şəhid ailələrinə, müharibə əlillərinə göstərdiyi diqqət və qayğını nəzərə alsaq, bəzi dəyişikliklər etməklə biz bu problemi aradan qaldırmış olarıq. Nəzərə almaq lazımdır ki, kifayət qədər müharibə əlili sağlamlıqlarını torpaqlarımızın azadlığı uğrunda itirib və neçə illər əvvəl dünyasını dəyişib. Onların heç növbəyə dayanma imkanları belə olmayıb. Yaxşı olardı ki, onların ailələrinin şəhid ailələri kimi imtiyazlardan istifadə etməsi üçün qanunvericiliyə dəyişikliklər edək”.

Q. Paşayeva son vaxtlar Azərbaycanda baş verən proseslərə İrandan göstərilən reaksiyalardan da danışıb: “İranın bir çox rəsmi şəxsləri Azərbaycanın daxili işlərinə qarışırlar, Azərbaycan əleyhinə açıqlamalar verirlər. Onların xüsusilə Ermənistana dəstəyi daha da artırmaqla, Azərbaycana qarşı fəaliyyət göstərdiklərini görürük. Mən İranda yaşayan soydaşlarımızı çağırıram ki, ölkələrində hansısa rəsmi şəxsin Azərbaycan əleyhinə fəaliyyətinə, eyni zamanda Ermənistana dəstəyin artmasına imkan verməsinlər, buna qarşı mübarizə aparsınlar. İranda yaşayan azərbaycanlılar ermənilərlə əməkdaşlıq etməməlidirlər”.

milli_məclis