Daxili siyasət

Ana səhifə

Daxili siyasət

Sərdar Cəlaloğlu: “İctimai Palata güc mərkəzi ola bilməz, adından da görünür ki, bu bir ictimai təşkilatdır”

02 fevral 2011 11:32 (UTC +04:00)

Bakı. Ramil Məmmədli – APA. “Qarabağ və Respublika Uğrunda Hərəkatın bərpası hazırkı məqamda aktual deyil. Müsavat Partiyası ölkədəki problemlərin həllini İctimai Palata səviyyəsində görür və diqqəti də ora yönəldib”.
Müsavat Partiyasının başqan müavini Tofiq Yaqublu APA-ya açıqlamasında deyib ki, təmsil etdiyi partiyanın Qarabağ və Respublika Uğrunda Hərəkatda təmsilçiliyi məsələsi müzakirə mövzusu deyil: “Azərbaycanda 2010-cu il parlament seçkilərindən sonra seçkilərin nəticələrindən narazı qalan müxalifət təşkilatları İctimai Palata yaradıb. Mənə elə gəlir ki, İqbal Ağazadənin və digərlərinin müraciətini bu prizmadan yanaşaraq cavablandıracağıq. Hələlik müraciət bizə daxil olmayıb”.

AXCP Ali Məclisinin sədri Həsən Kərimov isə hərəkatın bərpasına uğurlar arzulayıb: “İndiki dövrdə İctimai Palatada təmsil olunduğumuzdan, həmin hərəkatda təmsilçiliyimiz mümkün deyil. Buna görə də fəaliyyətimizi İctimai Palatada davam etdirəcəyik”.

Qarabağ və Respublika Uğrunda Hərəkatın bərpası təşəbbüsü ilə çıxış edən “Qarabağ” blokunun həmtəsisçisi, ADP sədri Sərdar Cəlaloğlu Müsavat Partiyası və AXCP funksionerlərinin açıqlamalarını əsassız hesab edib. O bildirib ki, İctimai Palata siyasi güc mərkəzi ola bilməz: “Adından da görünür ki, həmin qurum ictimai təşkilatdır və orada toplaşanların çoxu QHT-lərdir. Azərbaycanın “Siyasi partiyalar haqqında qanun”una görə, ictimai təşkilatlar siyasi məsələlərdə siyasi partiyalarla əməkdaşlıq edə bilməz. Bu həm də hüquqi məsələlərdir. Buna görə də hərəkatın bərpasını istəyirik”.

S. Cəlaloğlu deyib ki, bu gün Azərbaycanda siyasi güclərin birləşməsi zəruriyyəti var: “Bu nə İctimai Palataya alternativdir, nə də İctimai Palata hərəkatın funksiyasını yerinə yetirə bilər. Hərəkat heç bir maraq güdmədən ümumi ideya və məqsəd uğrunda insanların toplaşdığı qurumdur. Yəni partiyanın, blokun və hərəkatın bir-biri ilə alternativliyi yoxdur”.

ADP sədrinin sözlərinə görə, artıq Müsavat Partiyası və AXCP kimi hərəkatın təsisçilərinə və digərlərinə müraciət ediblər: “AXCP sədri Əli Kərimli mənə dedi ki, hərəkatın bərpasının əleyhinə deyil və hərəkatda təmsilçiliyə hazırdır. İndi imtina edirlərsə, deməli burada Müsavat Partiyasının təsiri hiss olunur”.

Milli Məclisin sabiq deputatı Pənah Hüseynov isə Qarabağ və Respublika Uğrunda Hərəkatın bərpa olunmasını, bu istiqamətdə addım atan siyasi təşkilatların hüququ adlandırıb: “Sərdar Cəlaloğlu ilə bu barədə danışmamışam. O, hər bir fikri ifadə edə bilər. Mən onlara hərəkatı bərpa etmək hüquqları olduğunu bildirirəm. Təqdir olunması isə o zaman olar ki, hərəkat yaransın və fəaliyyət göstərsin. Hüquqlara isə sayğı ilə yanaşmaq lazımdır”.

Xatırladaq ki, Qarabağ və Respublika Uğrunda Hərəkat 2009-cu ilin martında keçirilən Konstitusiya dəyişiklikləri ilə bağlı referendum zamanı 6 partiya – AXCP, ADP, ALP, VİP, Ümid və Müsavat partiyaları tərəfindən təsis edilib.

Qeyd edək ki, hazırda hərəkatın bərpası təklifi ilə 4 partiya ADP, ALP, VİP və Ümid Partiyası çıxış edib.