Daxili siyasət

Ana səhifə

Daxili siyasət

Əli Əliyev: “Qarabağ və Respublika Uğrunda Hərəkatın bərpasına dair konkret qərar verilməyib”

03 fevral 2011 09:27 (UTC +04:00)

Bakı. Ramil Məmmədli-APA. “Qarabağ və Respublika Uğrunda Hərəkatın bərpasına dair niyyətimizin nəticəyə çevrilməsi ilə bağlı konkret qərar verilməyib”.

Vətəndaş və İnkişaf Partiyasının (VİP) sədri Əli Əliyev APA-ya açıqlamasında bildirib ki, hərəkatın bərpasını istəyən Vətəndaş və İnkişaf, Ümid, Liberal, Demokrat partiyaları arasında bir neçə dəfə müzakirələr aparılıb və danışıqların yaxın günlər ərazində də davam etdirilməsi nəzərdə tutulub: “Niyyət ondan ibarətdir ki, “Qarabağ” blokunda təmsil olunan ADP və Ümid Partiyası ilə VİP və ALP münasibətlərinin malik olduğu prinsiplər ümumiləşdirilsin. Yəni səylər bir araya gətirilsin ki, müxtəlif istiqamətlər üzrə daha geniş fəaliyyətə nail ola bilək. Səylərin ümumiləşdirilməsini hansı yolla və mexanizmlə həyata keçirəcəyimiz isə bizim müzakirələrimizin və sonrakı fəaliyyətimizin nəticəsində bilinəcək”.

Ə. Əliyev hərəkatın bərpasına dair qərarın verilməsi üçün ciddi müzakirələrin davam edəcəyinə əminliyini də vurğulayıb: “Çalışırıq fəaliyyətimizi artıraq və işlərimizi sürətləndirək”.