Daxili siyasət

Ana səhifə

Daxili siyasət

AXCP-nin sədr müavini: “Hansı partiyanın üzvünün daha çox olması barədə polemikalar spekulyativ xarakter daşıyır”

07 fevral 2011 16:03 (UTC +04:00)

Bakı. Pərvin Abbasov - APA. “Biz dəfələrlə demişik və bir daha bəyan edirik ki, AXCP və Müsavatın birləşməsində sədr məsələsi önəmli deyil. Biz sədr seçilmə mövzusunun birləşmə prosesinin əvvəlində müzakirə olunmasını zərərli hesab edirik. Bu, birləşdirici qurultayın səlahiyyətinə aid olan məsələdir və bunu əvvəlcədən müzakirə etməyi qurultayın səlahiyyətlərinə müdaxilə hesab edirik”. Bunu APA-ya açıqlamasında AXCP sədrinin müavini Fuad Qəhrəmanlı Müsavat Partiyası Mərkəzi İcra Aparatının rəhbəri Arif Hacılının fikirlərinə münasibət bildirərkən deyib. O deyib ki, əgər AXCP ilə Müsavat Partiyası birləşərsə, sədrin hansı tərəfdən seçilməsinin fərqi yoxdur: “Sədr məsələsi sonuncu həll ediləcək bir məsələdir. Bunu ən əvvəldə müzakirəyə çıxarmaq prosesə ziyan vurar”.

F. Qəhrəmanlı Müsavat Partiyası üzvlərinin sayının AXCP üzvlərindən çox olması barədə A. Hacılının dedikləri ilə də razılaşmayıb: “Belə deyil. Bilirsiniz, hər bir partiya funksioneri mətbuata danışarkən çalışır ki, həm də təmsilçisi olduğu partiyanın təbliğatını aparsın, partiyasını daha güclü təqdim etsin. Ancaq mən AXCP-nin gücünü, imkanlarını hər hansı bir partiyanın gücüylə müqayisə etmək istəməzdim. AXCP ümummilli partiyadır. Bizim keçirdiyimiz son tədbirlərdə, ondan əvvəl isə aksiyalarda partiyamızın kifayət qədər böyük gücə sahib olduğu göründü. Həm də partiyaların gücünü seçkilər müəyyənləşdirir. Çox təəssüf ki, Azərbaycanda demokratik seçki keçirilmədiyindən, hansı partiyanın nə qədər gücü olduğu bilinmir. Ona görə də bu cür polemikalar spekulyativ xarakter daşıyır və ortaq məxrəcə, obyektiv fikrə gəlib çıxmaq mümkün deyil. Bu səbəbdən, indi partiyalar arasında “kim daha güclüdür?” polemikasının aparılması nə həmin partiyaların özlərinə, nə də Azərbaycan cəmiyyətinə lazımdır”.

Qeyd edək ki, A. Hacılı Müsavat Məclisinin sabiq sədri Sülhəddin Əkbərin fikirlərinə münasibət açıqlayarkən bunları deyib: “Müsavat Partiyasının rəhbərliyinin AXCP ilə birləşmənin baş tutacağı halda, hətta partiyanın adı Müsavat olsa belə, təşkilatın bizim nəzarətimizdən çıxmasından ehtiyatlanmağımız barədə Sülhəddin Əkbərin iddiası tamamilə əsassızdır. Partiyanın sədrinin seçilməsi təbii ki, partiyanın üzvlərinin rəyindən asılıdır. Müsavat Partiyasının üzvlərinin sayı AXCP-nin üzvlərinin sayından dəfələrlə çoxdur. Ona görə də ümumi siyasi razılıqlar, Müsavat Partiyası rəhbərliyinin təkidləri, Müsavat üzvlərinin xoş məramı, güzəştləri olmadan, Müsavat Partiyasının üzvü olmayan hər hansı şəxsin partiyamızın başqanı olması qeyri-mümkündür. Ona görə də Sülhəddin Əkbərin fikirlərinin heç bir əsası yoxdur”.

AXCP_Müsavat