Daxili siyasət

Ana səhifə

Daxili siyasət

Azərbaycanda əksər siyasi partiyaların Nizamnaməsində eyni şəxsin bir neçə dəfə sədr seçilməsi ilə bağlı məhdudiyyət yoxdur

10 fevral 2011 14:42 (UTC +04:00)

Bu, APA-nın partiya rəhbərləri arasında keçirdiyi sorğu zamanı məlum olub.

Hakim Yeni Azərbaycan Partiyasının (YAP) qurultayı dörd ildən gec olmayaraq keçirilir. Partiyanın Nizamnaməsində eyni şəxsin neçə dəfə partiya sədri seçilməsi ilə bağlı məhdudlaşdırıcı müddəa yoxdur.

Müsavat Partiyasının qurultayları dörd ildə bir dəfə keçirilir. Bu partiyanın Nizamnaməsində isə eyni şəxsin iki dəfədən artıq partiya başqanı seçilməsinə icazə verilmir.

Azərbaycan Xalq Cəbhəsi Partiyasının (AXCP) Nizamnaməsinə görə, qurultaylar iki ildə bir dəfə keçirilməlidir (partiya bu məqama əməl etmir. Cəbhəçilər qurultay və qurultayqabağı konfransların keçirilməsi üçün yer verilmədiyini əsas gətirirlər-red.). AXCP-nin Nizamnaməsində eyni şəxsin neçə dəfə partiya sədri seçilməsi ilə bağlı müddəa yoxdur.

Azərbaycan Demokrat Partiyasının (ADP) Nizamnaməsində isə belə bir müddəa var: eyni şəxs iki dəfədən artıq sədr seçilə bilməz. ADP-nin qurultayları beş ildən bir keçirilir.

Vətəndaş və İnkişaf Partiyasının (VİP) qurultayları üç ildən tez olmamaq şərti ilə keçirilir. Bununla yanaşı, partiyanın Nizamnaməsində növbədənkənar qurultayların keçirilməsi ilə bağlı da ayrıca müddəa var. Eyni şəxsin neçə dəfə sədr seçilməsi ilə bağlı müddəa isə yoxdur.

Azərbaycan Milli İstiqlal Partiyasının (AMİP) qurultayları üç ildən gec olmamaq şərti ilə keçirilir. Eyni şəxs iki dəfədən artıq AMİP sədri ola bilməz.

Klassik Xalq Cəbhəsi Partiyasının (KXCP) qurultayları üç ildən gec olmamaq şərti ilə keçirilir. KXCP-nin Nizamnaməsində eyni şəxsin neçə dəfə sədr seçilməsi ilə bağlı məhdudiyyət yoxdur.

Vətəndaş Həmrəyliyi Partiyasının (VHP) qurultayı dörd ildən bir keçirilir, eyni şəxsin neçə dəfə sədr seçilməsilə bağlı məhdudiyyət yoxdur.

Demokratik İslahatlar Partiyasının (DİP) qurultayları partiyanın Siyasi Şurası tərəfindən iki ildə bir dəfədən az olmayaraq çağırılır. Eyni şəxsin neçə dəfə sədr seçilməsi ilə bağlı məhdudiyyət yoxdur.

Eyni sözləri Ümid və Azərbaycan Liberal partiyaları haqqında da söyləmək olar: hər iki partiyada qurultaylar dörd ildən bir keçirilir və eyni şəxsin neçə dəfə sədr seçilməsi ilə bağlı məhdudiyyət yoxdur.

Mövzunu APA-ya şərh edən politoloq Hikmət Hacızadə bildirib ki, dünyada partiya sədrliyinə eyni şəxsin neçə dəfə seçilməsi ilə bağlı məhdudiyyət qoyulması praktikası yoxdur. Bu təcrübəyə az hallarda rast gəlinir: “Ümumiyyətlə, eyni şəxsin seçilməsi ilə bağlı təcrübə Amerikada XX əsrin ortalarından başlayıb. Bundan sonra həmin təcrübə yayılmağa başladı. Bu təcrübə əsasən dövlət strukturlarında rəhbər vəzifədə çalışan şəxslərlə bağlıdır. Ancaq dünya ölkələrində eyni şəxsin partiya sədri seçilməsi ilə bağlı məhdudiyyət yoxdur. Azərbaycanda isə bu ideyanı ilk olaraq Müsavat Partiyası ümumi demokratikləşmə prinsipi nöqteyi-nəzərindən irəli sürüb və tətbiq edib. Prinsipcə, Azərbaycan kimi ölkə üçün eyni şəxsin partiya sədri seçilməsi ilə bağlı məhdudiyyət lazımdır”.

partiya_sədr