Daxili siyasət

Ana səhifə

Daxili siyasət

Azərbaycanda aparılan korrupsiyaya qarşı mübarizə tədbirləri Milli Məclisdə müzakirə olunub

11 fevral 2011 10:13 (UTC +04:00)

Bakı. Rəşad Süleymanov - APA. Milli Məclisin bu gün keçirilən iclasında ölkədə aparılan korrupsiyaya qarşı mübarizə tədbirləri müzakirə olunub. APA-nın məlumatına görə, cari məsələlərin müzakirəsi zamanı bir sıra deputatlar korrupsiya ilə mübarizə tədbirlərindən danışıblar.

Deputat Əli Məsimli Şəkidə baş verən olaylara toxunaraq qanunsuz söküntü işlərinin aparılmasına son qoyulmasını, baş verən cinayət hadisəsinin səbəbkarlarına qarşı müvafiq tədbirlərin görülməsini təklif edib.

Millət vəkili İqbal Ağazadə isə təklif edib ki, Korrupsiya ilə mübarizə komissiyasına ictimai təşkilatların və siyasi partiyaların nümayəndələri də daxil edilsin. Bu öz növbəsində şəffaflığın təmin olunması və effektlilik baxımından önəmlidir.

Millət vəkili Fazil Mustafa da deputat həmkarlarının təklifini dəstəkləyib. Millət vəkili Mədən Sənayesində Şəffaflığın Artırılması Koalisiyası tərəfindən hazırlanmış «Neft Fondu haqqında» qanun layihəsinin parlamentə təqdim olunduğunu və bu layihənin müzakirəyə çıxarılmasının vacibliyinə toxunub.

Deputat Qüdrət Həsənquliyev isə deyib ki, korrupsiya ilə mübarizə sahəsində atılan addımlar və prezidentin çıxışları əhali tərəfindən müsbət qarşılanır. Bu cür addımların təqdir olunmasının vacibliyinə toxunan millət vəkili bildirib ki, Milli Məclisdə bu sahədə fəaliyyət göstərən dövlət strukturlarının nümayəndələrinin iştirakı ilə müzakirənin aparılmasına ehtiyac var. Deputat Müdafiə Nazirliyi (MN) rəhbərliyinin Mübariz İbrahimovun “İlin adamı” elan olunması ilə bağlı tədbirdə iştirak etməli olduğunu da diqqətə çatdırıb. Q. Həsənquliyev, həmçinin vəkil Osman Kazımovun Vəkillər Kollegiyasının üzvlüyündən kənarlaşdırılması ilə bağlı məhkəməyə müraciət edilməsi barədə də danışıb. Deputat spikerdən tanınmış vəkilin hüquqlarının müdafiəsinə kömək etməyi xahiş edib.

Millət vəkili Qənirə Paşayeva isə sonradan dünyasını dəyişmiş müharibə əlillərinin ailələrinin mənzillə təmin olunması ilə bağlı müvafiq qanunvericiliyə əlavələrin gələn həftə Sosial siyasət komitəsinin iclasında müzakirə olunacağını vurğulayıb. Deputat şəhid övladlarının imtiyazlarından 18 yaşından sonra da istifadə etmə imkanlarının artırılmasının vacibliyini, bununla bağlı qanunvericiliyə dəyişikliklərin edilməsini təklif edib.

Millət vəkili Fərəc Quliyev Milli Məclisdə Qarabağla bağlı qapalı dinləmələrin keçirilməsini təklif edib.

Sabir Rüstəmxanlı isə qeyd edib ki, BMT-nin Bakıdakı nümayəndəliyi İrandan gələn azərbaycanlılara qarşı süni maneələr yaradır. İrandan gələn azərbaycanlılar burada problemlərlə üzləşirlər.

Spiker Oqtay Əsədov isə deyib ki, dövlət başçısı ölkədə islahatların keçirilməsi barədə fikirlərini açıqlayıb və bu sahədə islahatlar davam etdiriləcək.

O. Əsədov Q. Həsənquliyevin MN rəhbərliyinin M. İbrahimovla bağlı tədbirdə iştirak etməməsi barədə dediklərinə də münasibət bildirib. Spiker “Müdafiə Nazirliyinin rəhbərliyi tədbirə dəvət olunsaydı, yəqin ki, iştirak edərdi” söyləyib.