Daxili siyasət

Ana səhifə

Daxili siyasət

Ötən il Azərbaycanda qanun pozuntularına yol verən 21 bələdiyyə üzrə cinayət işi başlanıb

11 fevral 2011 11:10 (UTC +04:00)

Bakı. Rəşad Süleymanov – APA. Azərbaycan Milli Məclisinin (MM) bu gün keçirilən iclasında bələdiyyələrin fəaliyyətinə inzibati nəzarəti həyata keçirən orqanın illik məruzəsi müzakirə olunub. APA-nın məlumatına görə, məruzəni Milli Məclisə ədliyyə nazirinin müavini Vilayət Zahirov təqdim edib.

Nazir müavini bildirib ki, ötən il görülmüş tədbirlər nəticəsində birləşmiş 1552 bələdiyyənin əmlakı, maliyyə vəsaiti, debitor və kreditor borcları müəyyən edilərək aktlaşdırılıb. Təhvil-təslim aktları tərtib edilib. Zəruri sənədlər yeni yaradılmış 569 bələdiyyəyə təhvil verilib. Bələdiyyə seçkiləri baş tutmamış 15 özünüidarə orqanları üzrə isə təhvil-təslim aparılmayıb. Birləşmə komissiyalarının təqdim etdiyi məlumatlar əsasən 11 bələdiyyənin fəaliyyəti inzibati nəzarət icraatı qaydasında araşdırılıb və ciddi qanun pozuntuları aşkarlandığı üçün Baş Prokurorluğa göndərilib.

Ötən dövrdə 501 yeni bələdiyyənin nizamnaməsi Ədliyyə Nazirliyində qeydiyyata alınıb, 1332 bələdiyyənin nizamnaməsi isə qüvvədən düşdüyünə görə dövlət reyestrindən çıxarılıb.

V. Zahirov qeyd edib ki, ötən il Ədliyyə Nazirliyində 26 635 bələdiyyə aktına baxılıb, bu aktlardan 25 363-ü qanunvericiliyə uyğun hesab edilib, 545 akta isə hazırda baxılır. Aktlardan 3-də cinayət xarakterli hüquq pozuntuları aşkar edilərək toplanan materiallar hüquqi qiymət verilməsi üçün Baş Prokurorluğa göndərilib.

Ötən dövrdə görülmüş tədbirlər nəticəsində bələdiyyələr tərəfindən qanunsuz olaraq 79,07 ha torpaq sahəsinin ayrı-ayrı şəxslərin mülkiyyətinə, 3210,54 ha torpaq sahəsinin icarəyə, 27,85 ha torpaq sahəsinin isə istifadəyə verilməsi ilə bağlı qərarlar nazirliyin təklifi əsasında bələdiyyələr tərəfindən, ya da ərizələr əsasında məhkəmələr tərəfindən ləğv edilib. Bütövlükdə 3317,46 ha torpaq sahəsinin qanunsuz verilməsinin qarşısı alınıb. Tərtib edilmiş 481 inzibati xəta protokolu əsasında 409 bələdiyyə sədri məhkəmələr tərəfindən inzibati məsuliyyətə cəlb edilib. Hesabat ilində bələdiyyələrin fəaliyyəti ilə bağlı hüquqi və fiziki şəxslər tərəfindən 1468 şikayət xarakterli müraciət daxil olub. Onlardan 1002-nə baxılaraq tədbirlər görülüb. Müraciətlərin 45-i inzibati qaydada araşdırılıb. Onlardan 24-ü üzrə materiallar Baş Prokurorluğa göndərilib. Ümumilikdə inzibati araşdırmalar zamanı fəaliyyətində cinayət xarakterli qanun pozuntuları aşkar edilmiş 27 bələdiyyə üzrə materiallar Baş Prokurorluğa göndərilib. Onlardan 21-i üzrə cinayət işi başlanılıb. Aşkar edilmiş pozuntular əsasən torpaq sahələrinin qanunsuz satışı və pul vəsaitlərinin düzgün xərclənməməsi ilə bağlı olub. Korrupsiya ilə mübarizə tədbirləri çərçivəsində isə 2010-cu ildə Ədliyyə Nazirliyinə 39 müraciət daxil olub, ki onlardan 27-si inzibati qaydada araşdırılıb, 12-si isə dərhal prokurorluq orqanlarına göndərilib, onlardan 2-si üzrə cinayət işi başlanılıb.