Daxili siyasət

Ana səhifə

Daxili siyasət

Milli Məclis bələdiyyələrin fəaliyyəti ilə bağlı illik məruzəni təsdiqləyib

11 fevral 2011 14:23 (UTC +04:00)

Bakı. Rəşad Süleymanov – APA. Azərbaycan Milli Məclisi (MM) bələdiyyələrin fəaliyyətinə inzibati nəzarəti həyata keçirən orqanın illik məruzəsini qəbul edib. APA-nın xəbərinə görə, ədliyyə nazirinin müavini Vilayət Zahirov məruzəni təqdim edəndən sonra deputatlar sənəd haqqında fikirlərini bildiriblər. Millət vəkilləri bələdiyyələrin fəaliyyətinə müdaxilələrə son qoyulmasını, onların stimullaşdırılmasını təklif ediblər. Deputat Vahid Əhmədov və Yevda Abramov yerli icra hakimiyyətlərinin bəzi səlahiyyətlərinin bələdiyyələrə verilməsini təklif ediblər. Y. Abramov bildirib ki, hazırda Azərbaycanda bələdiyyələr və icra hakimiyyətləri arasında vəzifələr tam bölünməyib.
Deputat Qüdrət Həsənquliyev bələdiyyələrə olan münasibətin dəyişməsini, Türkiyədə olduğu kimi, onlara əlavə səlahiyyətlərin verilməsini təklif edib. Millət vəkili bildirib ki, bələdiyyələrə əlavə səlahiyyətlər verilməsi əvəzinə, onların zibil yığmaq səlahiyyətləri də əllərindən alınıb. Q. Həsənquliyev bələdiyyələrə dövlət tərəfindən maliyyə yardımlarının artırılmasına da vacib sayıb.
Millət vəkili Fəzail Ağamalı da bəzi rayonlarda icra hakimiyyəti başçılarının bələdiyyələrin fəaliyyətinə müdaxilələr etdiklərini deyib. Deputat onu da vurğulayıb ki, rayonlarda bələdiyyələr icra başçısından xəbərsiz və icazəsiz torpaq sata bilməzlər. Bununla yanaşı, o, bələdiyyələrin çoxlarının öz vəzifələrini və hüquqlarını bilmədiklərini deyib.

«Elektron bələdiyyə» layihəsinin başlanmasını dəstəkləyən deputat Azay Quliyev isə növbəti ilin hesabatlarında bələdiyyələrin seçicilər qarşısında hesabat verməsinə də aydınlıq gətirilməsini təklif edib. Deputat bələdiyyələrin informasiya-məlumat resurslarına çıxışı imkanlarının artırılmasını önəmli saydığını açıqlayıb.

Millət vəkili Qənirə Paşayeva isə çıxışında bildirib ki, bu gün bələdiyyələr kiçik toplantı şəklində öz aralarında biri-birinə hesabat verirlər: “Əslində bu 2-3 nəfərə yox, geniş şəkildə bütün ictimaiyyətə verilməlidir. Bu hesabatın formaları artıq qanunvericilikdə mövcuddur. Təəssüf ki, çox az bələdiyyələrin bu formalar haqqında təsəvvürü var. Çox yaxşı olardı ki, Milli Məclis qanunvericilik əsasında bələdiyyələrdən hesabat tələb etsin. Bələdiyyələrin fəaliyyətinin güclənməsində ən vacib amil büdcə məsələsidir. Bəzi məsələlər öz həllini tapsa, bələdiyyələrin büdcəsinə təsir edər”.
MM-in vitse-spikeri Bahar Muradova isə bələdiyyələrə büdcədən vəsait ayrılmasına tərəfdar olduğunu deyib. B. Muradova daha sonra qeyd edib ki, bələdiyyələr onlara verilən səlahiyyətlərdən istifadə etməlidir: “Bələdiyyələr qrant ala bilər. Bəlkə dövlət tərəfindən QHT-lər kimi, bələdiyyələr də müəyyən formada maliyyələşdirilsin?»
Sonda ədliyyə nazirinin müavini Vilayət Zahirov deputatların suallarını cavablandırıb. Məruzə səsə qoyularaq 105 nəfər lehinə olmaqla təsdiq edilib.