Daxili siyasət

Ana səhifə

Daxili siyasət

Arif Hacılı: “Yeni birlik axtarışına ehtiyac yoxdur”

16 fevral 2011 14:11 (UTC +04:00)

Ümid Partiyasının sədri İqbal Ağazadə APA-ya açıqlamasında deyib ki, müxalifət maksimum dərəcədə bir araya topalana bilsə, ictimai-siyasi proseslərə təsir edə bilər: “Hərəkatın bərpası istiqamətində nələrə nail olmağın mümkünlüyünü əvvəlcədən proqnozlaşdırmaq istəmirəm. Bunu siyasi partiyaların verdiyi qərarlar və zaman göstərəcək. Hərəkatın təsisçisi olmuş 6 partiya arasında aparılan müzakirə hələlik tam təmaslar deyil. Bunu bütövləşdirib, fikir halına salmağa ehtiyac var. Hesab edirəm ki, siyasi partiyalar bunun öhdəsindən gələ biləcək”. İ. Ağazadə vurğulayıb ki, hərəkatın həmtəsisçiləri olmuş partiya rəhbərlərinin sonuncu görüşündə iştirak edən liderlər növbəti dəfə də bir yerdə olmaqda problem görməyiblər.

Müxalifətin birliyi istiqamətində müxtəlif ideya və təkliflərin yenidən gündəmə gəldiyini deyən Azərbaycan Demokrat Partiyasının (ADP) sədri Sərdar Cəlaloğlu APA-ya bildirib ki, siyasi qüvvələrin indiki situasiyada bir araya gəlməsi aktualdır: “Güman ki, görüşlər davam edəcək. Bütün müxalifətin bir yerdə olmasına heç bir alternativ yoxdur. Sadəcə, fikir ayrılığı ondadır ki, bütün qüvvələr İctimai Palatada toplansın, Qarabağ və Respublika Uğrunda Hərəkat bərpa olunsun və ya üçüncü qurummu yaradılsın? Bu gün müxalifətin birliyi ilə bağlı formatı vacib hesab etmirəm. Lazımsız mübahisələri kənara qoyub, daha çox mahiyyət üzrə işləməliyik. Yəni, brend, və ya bayraq uğrunda vuruşsaq, əhəmiyyəti olmayacaq”.

Azərbaycan Liberal Partiyanın sədri Əvəz Temirxan 6 partiya arasında keçirilən görüşdəki razılaşmalar barədə danışmaq istəməsə də, müxalifətin ortaq məxrəcə gəlməsini zəruri hesab edir: “Liberal Partiyanın konkret təklifləri var. Əgər partiyalar dinləməyə hazırdırsa, bu təklifləri təqdim edə bilərəm. Hamı simasını saxlasın, ümumi iş naminə işləyək”.

Vətəndaş və İnkişaf Partiyasının (VİP) sədri Əli Əliyev isə məsələyə optimist yanaşıb: “Partiyalar arasında uzlaşma sahəsində iş gedir. Nədənsə hərəkatın bərpası ilə bağlı səhv təqdimat və təbliğat işi davam etdirilir. Hərəkatın bərpası İctimai Palatanın əleyhinə yönəlməyib. Şəxsi məsələləri kənara qoymaqla, milli marağı öndə tutub, uzlaşmaq mümkündür”. Ə. Əliyev müxalifət düşərgəsində təmsil olunan AXCP, ADP, ALP, VİP, Müsavat və Ümid partiyalarının yenidən bir qurumda - Qarabağ və Respublika Uğrunda Hərəkatda təmsil olunması istiqamətində gedən proseslə bağlı fikir söyləməyə tələsməyin məqsədəuyğun hesab olunmadığını da söyləyib.

Hərəkatın həmtəsisçiləri olmuş AXCP və Müsavat Partiyasından isə müxalifətin birliyi təklifinə dair yanaşma fərqlidir. AXCP sədrinin müavini Fuad Qəhrəmanlı APA-ya deyib ki, indiki halda müxalifətin birliyi üçün uğurlu model İctimai Palatanın genişləndirilməsi və palata daxilində əlaqələrin dərinləşdirilməsidir. İctimai Palatanın məşvərətçi qurum kimi fəaliyyətini davam etdirməsi də gündəmdə deyil.
Müsavat Partiyasının Mərkəzi İcra Aparatının rəhbəri Arif Hacılı isə ümumiyyətlə hərəkatın təsisçiləri olmuş partiya rəhbərlərinin görüşü, orada aparılan müzakirələr və bu istiqamətindəki proses barədə məlumatsız olduğunu diqqətə çatdırıb: “Bu barədə mətbuatda oxumuşam. Azərbaycanda az-çox siyasi resursa malik olan siyasi partiyalar, ictimai birliklər, siyasi xadimlər İctimai Palatada birləşib. Ona görə də yeni birlik axtarışına ehtiyac yoxdur”.