Daxili siyasət

Ana səhifə

Daxili siyasət

Yeni Azərbaycan Partiyası nümayəndə heyətinin Rumıniyaya səfəri başa çatıb

18 fevral 2011 14:43 (UTC +04:00)

Bakı. Pərvin Abbasov – APA. Hakim Yeni Azərbaycan Partiyasının (YAP) nümayəndə heyəti Rumıniyaya səfər çərçivəsində bir sıra görüşlər keçirib. Bu barədə APA-ya YAP-ın mətbuat xidmətindən məlumat verilib.

Nümayəndə heyətinin səfər proqramına uyğun olaraq hakim Demokrat Liberal Partiyasının (PDL) qərargahında iki partiyanın rəhbərliyi arasında görüş keçirilib. Görüşdə YAP tərəfindən partiyanın sədr müavini - icra katibi Əli Əhmədov, PDL tərəfindən isə sədrin birinci müavini Adriean Videanu tərəfindən YAP və PDL arasında “Əməkdaşlıq haqqında Anlaşma Memorandumu” imzalanıb. Ə. Əhmədov təmsil etdiyi partiya adından PDL nümayəndə heyətini Azərbaycana səfərə dəvət edib, dəvət qarşı tərəfdən razılıqla qarşılanıb.

YAP nümayəndə heyətinin Rumıniya parlamentinin Deputatlar Palatasının sədri xanım Roberta Anastase ilə görüşü keçirilib.

Heydər Əliyev Fondunun Rumıniyadakı nümayəndəliyində YAP nümayəndə heyətinin bu ölkədə təhsil alan və yaşayan azərbaycanlılarla geniş tərkibli görüşü də keçirilib.

Heydər Əliyev Fondunun Rumıniyadakı nümayəndəliyinin direktoru İqbal Hacıyev təmsil etdiyi təşkilatın həyata keçirdiyi xeyriyyə layihələrindən bəhs edib, Fondun rəhbəri, Milli Məclisin deputatı, Azərbaycan Mədəniyyətinin Dostları Fondunun prezidenti, UNESCO və İSESCO-nun Xoşməramlı səfiri xanım Mehriban Əliyevanın tövsiyəsinə əsasən nəinki Rumıniyada, bütün Balkan regionunda Azərbaycan həqiqətlərinin təbliğ olunması üçün geniş fəaliyyətlərin aparıldığını, yalnız Rumıniyada bu istiqamətdə 50-dən çox kitabın nəşr olunduğunu nəzərə çatdırıb.

YAP nümayəndə heyəti Azərbaycanın Rumıniyadakı səfirliyini də ziyarət edib, səfirliyin kollektivi ilə görüş keçirib.

Görüşlərdə Azərbaycanın Rumıniyadakı səfiri Eldar Həsənov iştirak edib.

Bununla da YAP nümayəndə heyətinin Rumıniyaya səfəri başa çatıb.
Qeyd edək ki, nümayəndə heyətinə YAP-ın sədr müavini – icra katibi Əli Əhmədov, icra katibinin müavini, Milli Məclisin üzvü Mübariz Qurbanlı və Milli Məclisin üzvü Asəf Hacıyev daxil idi.