Daxili siyasət

Ana səhifə

Daxili siyasət

“Xocalı Soyqırımı: şahidlərin dili ilə” kitabı nəşr olunub

21 fevral 2011 06:39 (UTC +04:00)

Bakı – APA. Xocalı soyqırımının 19-cu ildönümü ərəfəsində, Azərbaycan və Türkiyə
türkcələrində olmaqla “Xocalı Soyqırımı: şahidlərin dili ilə” (“Hocalı Soykırımı: tanıkların dilinden”) adlı kitab işıq üzü görüb. APA-nın məlumatına görə, millət vəkili, siyasi elmlər üzrə fəlsəfə doktoru Qənirə Paşayeva və “Dağlıq Qarabağın azərbaycanlı icması” İctimai Birliyinin İdarə Heyətinin üzvü, keçmiş millət vəkili Həvva Məmmədovanın həmmüəllifliyi ilə hazırlanmış kitab Xocalı soyqırımını şahidlərin dili ilə oxucuya çatdırır. Kitabda Xocalı soyqırımı şahidlərinin, ermənilərin əsir və girovluğunda amansız işgəncələrə məruz qalmış Xocalı sakinlərinin acı xatirələri yer alıb. Kitabda həmin dövrdə Xocalı soyqırımı ilə bağlı dünya mediasında dərc olunmuş məqalələr, Heydər Əliyevin və prezident İlham Əliyevin Xocalı soyqırımı ilə bağlı fikirləri, bəyanatları, Milli Məclisin dünya parlamentlərinə müraciəti də öz əksini tapıb.

Bundan başqa, kitabda bu soyqırımı ilə bağlı müxtəlif beynəlxalq təşkilatlarda yayılmış və qəbul olunmuş sənədlər də yer alıb. Nəşrdə, həmçinin soyqırımı dəhşətlərini, ümumən erməni terrorunu əks etdirən foto-faktlar, dəqiq rəqəmlərlə tərtib olunmuş siyahılar, o cümlədən, həlak olan, əsir və girov götürülən, itkin düşən Xocalı sakinlərinin, bütün üzvləri öldürülmüş ailələrin və s. siyahılar verilib.

Kitabın Türkiyə türkcəsində nəşrində məqsəd, Xocalı həqiqətlərinin və ümumən Azərbaycan həqiqətlərinin daha geniş təbliği işinə xidmət edir. Kitab Türkiyənin İstanbul, Yalova, İsparta, İzmir şəhərlərində, eləcə də paytaxt Ankarada Xocalı soyqırımının 19-cu ildönümünə həsr olunmuş anım tədbirlərində ictimaiyyətə təqdim olunacaq və yayılacaq.

Qeyd edək ki, millət vəkili Qənirə Paşayeva artıq Xocalı soyqırımının 19-cu ildönümünə həsr olunmuş anım tədbirlərində iştirak etmək üçün Türkiyəyə yola düşmüşdür. Bu gün Yalovada Xocalı soyqırımının 19-cu ildönümünə həsr olunmuş anım tədbirləri keçiriləcək və bu tədbirlər çərçivəsində “Hocalı soykırımı: tanıkların dilinden” kitabının təqdimatı və yayımı təşkil olunacaq.

Kitabın Azərbaycan dilində olan versiyası Bakıda soyqırımının ildönümü günü – fevralın 26-da ictimaiyyətə təqdim ediləcək. Bundan sonra xüsusilə xaricdə yaşayan soydaşlarımız arasında, Azərbaycan diasporunun fəalları arasında geniş yayılmaq üçün xarici ölkələrə göndəriləcək. Müəlliflər yaxın zamanlarda kitabın ingilis dili versiyasının da işıq üzü görəcəyini bildirirlər.
Kitabın redaktoru Azərbaycanda Atatürk Mərkəzinin ictimai-siyasi şöbəsinin müdiri Əkbər Qoşalıdır.

Xocalı