Daxili siyasət

Ana səhifə

Daxili siyasət

Əhməd Oruc: “Mirmahmud Mirəlioğlunun Demokratiya Uğrunda İttifaqın dağılması barədə sözləri yalandır”

23 fevral 2011 08:20 (UTC +04:00)

Bakı. Ramil Məmmədli-APA. “Mirmahmud Mirəlioğlu yalan deyir, Demokratiya Uğrunda İttifaq dağılmayıb”. Bu açıqlamanı APA-ya Azadlıq Partiyasının sədri Əhməd Oruc verib. O bildirib ki, DUİ-də 2 partiya - Azadlıq və Milli Qurtuluş partiyaları öz fəaliyyətini davam etdirir: “Ötən gün keçirilən iclasda Mirmahmud Mirəlioğlu təklif etdi ki, DUİ-nin fəaliyyətini dayandıraq. Bu təklifin səbəbini soruşduqda o, arqumentlərini ortaya qoya bilmədi”.

Ə. Oruc deyib ki, KXCP sədri bir neçə gün öncə DUİ-də təmsil olunan partiyaların xəbəri olmadan bu qurumun qərarının əleyhinə addım atıb: “Ötən həftə KXCP DUİ-nin qərarının əksinə olaraq İctimai Palatada təmsil olunmaq haqda qərar verib və Ədalət Yusubovu təmsilçi təyin edib. Bu, görünməmiş bir şeydir. Ondan mövqeyini qətiləşdirməsini istədikdə DUİ-nin fəaliyyətinə xitam verilməsi təklifi ilə çıxış etdi. Biz isə DUİ-nin buraxılmasının tərəfdarı olmadığımızı və çıxmaq istəyirsə qərar verməsini xahiş etdik. Mirmahmud Mirəlioğlu DUİ-nin qərarını pozduqlarına görə KXCP-nin DUİ-dən çıxarılacağından ehtiyatlandığından bu açıqlamanı verib”.

KXCP sədri Mirmahmud Mirəlioğlu isə deyib ki, DUİ təsisçilərin razılığı ilə fəaliyyətini dayandırıb: “Böyük Azərbaycan Partiyasının Siyasi Şurasının DUİ-də fəaliyyətlərinə xitam verilməsi ilə bağlı qərarları var idi. Onu müzakirə etdik və müsbət qiymətləndirdik və biz də onlara dəstək verdik. Bundan sonra DUİ-nin fəaliyyətinə xitam verilməsi haqqında məsələni iki gün müzakirə etdik. Bu qənaətə gəldik ki, DUİ-nin fəaliyyətinə xitam verək”.

DUİ-nin fəaliyyətinə xitam verilməsi məsələsinin gündəmə birdən-birə gəlmədiyini də deyən M. Mirəlioğlu bununla bağlı ilin əvvəlindən müzakirələrin aparıldığını söyləyib: “Seçkilərdən sonra Azərbaycan Xalq Partiyası, ondan qabaq isə Azərbaycan Milli Demokrat Partiyası DUİ-dən çıxdı. Getdikcə prosesin bu şəkildə davam etməsinin tərəfdarı deyildik. Ona görə də qərara gəldik ki, hörmətlə işə başladığımız kimi, qarşılıqlı hörmətlə də DUİ-nin fəaliyyətinə də xitam verək”.

M. Mirəlioğlu DUİ-də ikitərəfli əməkdaşlığın davam edəcəyini də qeyd edib: “KXCP-nin İctimai Palatada təmsilçiliyi məsələsi də bitib. İctimai Palatada təmsil olunan partiya üzvlərinin təmsilçisi kimi isə KXCP-dən Ədalət Yusubovu təyin etmişik. Bundan o tərəfə məsələ gündəmdə deyil. Bundan sonra hansısa birliyin yaradılması da gündəmdə deyil”.