Daxili siyasət

Ana səhifə

Daxili siyasət

Milli Məclisinin Təhlükəsizlik və Müdafiə Komitəsinin iclası keçirilib

23 fevral 2011 10:22 (UTC +04:00)

Bakı. Pərvin Abbasov – APA. Bu gün Azərbaycan Milli Məclisinin Təhlükəsizlik və Müdafiə Komitəsinin iclası keçirilib. APA-nın məlumatına görə, iclasda “Azərbaycan Respublikasının Hökuməti ilə Latviya Respublikasının Hökuməti arasında fövqəladə halların xəbərdar edilməsi və aradan qaldırılması sahəsində əməkdaşlıq haqqında saziş” sənədinin təsdiqlənmək üçün Milli Məclisin iclasına çıxarılması məsələsi müzakirə olunub. Qeyd olunub ki, saziş 17 yanvar 2011-ci ildə Azərbaycan prezidentinin Latviyaya səfəri zamanı imzalanıb. 18 maddədən ibarət Sazişdə iki ölkə arasında fövqəladə hallar zamanı çıxan problemlərin qarşısının müxtəlif formalarda alınması barədə məsələlər nəzərdə tutulur. Xatırladılıb ki, sazişi Azərbaycanın fövqəladə hallar naziri Kəmaləddin Heydərov və Latviyanın daxili işlər naziri xanım Linda Murniese imzalayıblar.

Çıxış edən komitənin üzvləri bildiriblər ki, bu sənəd Azərbaycanın milli maraqlarına uyğun gəlir, mənafelərinə cavab verir. Sonda sənəd təsdiqlənmək üçün parlamentin sessiyasına tövsiyə olunub.

İclasda həmçinin son günlərdə 8 dövlətin Azərbaycanın işğal altında olan rayonlarına səfər etməmək barədə xəbərdarlığı da müzakirə olunub. Qeyd edilib ki, bu, Azərbaycanın xarici siyasətinin uğurudur.