Daxili siyasət

Ana səhifə

Daxili siyasət

Vəkil Elçin Qəmbərov: “Nəşriyyatlardan biri ilə müqavilə bağlasam, 1995-ci ilin mart hadisələri haqqında kitab yazacağam”

28 fevral 2011 10:50 (UTC +04:00)

Bakı. Pərvin Abbasov – APA. Azərbaycan Vəkillər Kollegiyasının üzvü Elçin Qəmbərov mətbuat konfransı keçirib. APA-nın məlumatına görə, E. Qəmbərov bildirib ki, mətbuat konfransı keçirməsinə səbəb onun “Bakı-Xəbər” qəzetinin bir neçə sayında 1995-ci ilin mart hadisələri ilə bağlı yazı yazdıqdan sonra guya kitab çap etdirməsi barədə yanlış məlumatlar yazılmasıdır: “Bir neçə qəzetdə gedən xəbərlərdə kitab müəllifinin adı çəkilməsə də, söhbət məndən gedirdi. Guya ki, Prezident Administrasiyası tərəfindən kitab hazırlanıb, mənim müəllifliyim göstərilməklə çap olunur. Bəs hanı kitab? Bunlar hamısı yalandır”.

1995-ci ilin mart hadisələrinə dair cinayət işi aparılarkən sabiq xarici işlər naziri Tofiq Qasımovun vəkili olduğunu xatırladan E. Qəmbərov deyib ki, onun arxivində cinayət işinin surəti olub: “Turqut Ərin kitabından hissələri mətbuatda oxuyanda hadisələrin düzgün yazılmadığını gördüm və qəzetdə bu barədə məqalələr çap etdirdim. Yazdıqlarımın hamısı cinayət işindəki ifadələrə əsaslanıb, orada hansısa təhlil aparmamışam. Özü də yazdıqlarım Turqut Ərə cavab deyildi, sadəcə, polemika xarakterli idi”.

1995-ci ildə Tansu Çillər hökuməti də daxil olmaqla bəzi maraqlı qüvvələrin Azərbaycanda siyasi çevriliş etmək istədiklərini söyləyən E. Qəmbərovun sözlərinə görə, həmin vaxt bu məsələlər Azərbaycan-Türkiyə münasibətlərinin pozulmaması üçün ortaya çıxarılmayıb. O qeyd edib ki, Turqut Ərin kitabında qəhrəman kimi təqdim etdiyi Fərman Dəmirqol, Kənan Gürel və başqaları əslində çevriliş etmək istəyiblər, Rövşən Cavadovdan isə istifadə ediblər. E. Qəmbərov Fərman Dəmirqolun Bakıda Azərbaycan Strateji Araşdırmalar Mərkəzi (ASAM) adlı qurum yaratdığını, hazırkı deputat Rasim Musabəyovun isə həmin qurumun təmsilçilərindən biri olduğunu vurğulayıb: “Həmin qurum iclaslarını Türkiyə səfirliyinin dini müşavirliyində keçirirdi. ASAM-ın məqsədi siyasi müxalifətlə hərbi müxalifəti birləşdirmək olub. Bu hadisələrlə bağlı kitab yazmağı düşünmürdüm. Azərbaycanın ən yeni tarixinin bu və digər hadisələri haqqında təqaüdə çıxandan sonra yazmağı planlaşdırırdım. Ancaq bu hadisələrlə bağlı indi özüm də kitab yazmağın marağındayam. Nəşriyyatlardan biri ilə müqavilə bağlasam, 1995-ci ilin mart hadisələri haqqında kitab yazacağam”.

Qeyd edək ki, E. Qəmbərov AXCP sədri Əli Kərimlinin vəkili və AXCP-nin üzvü olub. O, keçən ilin oktyabr ayında partiyadan istefa verib.