Daxili siyasət

Ana səhifə

Daxili siyasət

Qənirə Paşayeva və Həvva Məmmədovanın “Xocalı soyqırımı: şahidlərin dilindən” kitabının təqdimatı keçirilib

28 fevral 2011 13:52 (UTC +04:00)

Bakı. Ramil Məmmədli-APA. “Dağlıq Qarabağın Azərbaycanlı İcması” İctimai Birliyinin binasında Milli Məclisin deputatı Qənirə Paşayeva və keçmiş millət vəkili Həvva Məmmədovanın müəllifliyi ilə nəşr olunan “Xocalı soyqırımı: şahidlərin dilindən” kitabının təqdimatı keçirilib. APA-nın məlumatına görə, icmanın sədri, Şuşa rayon İcra Hakimiyyətinin başçısı Bayram Səfərov çıxışında Xocalının işğalı zamanı erməni hərbçilərinin mülki şəxslərə qarşı törətdikləri qətliam barədə danışıb. Onun sözlərinə görə, dəqiq faktlara əsaslanaraq, müasir texnologiyanın imkanlarından istifadə etməklə ermənilərin yalan üzərində qurulan təbliğatları iflasa uğradıla bilər.

Qənirə Paşayeva deyib ki, soyqırımın 19-cu ildönümü ilə bağlı Türkiyədə keçirilən tədbirlərdə nəşrin Türkiyə türkcəsində olan nüsxəsi - “Hocalı soykırımı: tanıkların dilinden” kitabı vətəndaşlara paylanıb. Kitabda işğal zamanı girovluqda işgəncələrə məruz qalmış Xocalı sakinlərinin acı xatirələri də yer alıb. Burada həmçinin, faciədən sonra soyqırımla bağlı dünya mediasında dərc olunan məqalələr, Heydər Əliyevin və prezident İlham Əliyevin qətliamla əlaqədar fikirləri, bəyanatları öz əksini tapıb. Kitabda erməni terrorunu əks etdirən fotolar, dəqiq rəqəmlərlə tərtib olunan siyahılar, həmçinin həlak olan, əsir və girov götürülən, itkin düşən Xocalı sakinlərinin, bütün üzvləri öldürülən ailələrin siyahıları da oxucuya çatdırılıb.

Həvva Məmmədova isə bildirib ki, vətənpərvərlik ruhunun qaldırılması, düşmənimizin kimliyinin öyrənilməsi məqsədilə bu kimi kitablara ehtiyac var: “Kar və kor olmuş dünya və beynəlxalq təşkilatların diqqətinə çatdırmaq üçün belə kitablar hər zaman nəşr olunmalıdır”.

Sonra tədbirdə ombudsman Elmira Süleymanova və Xocalı sakinləri çıxış ediblər. Çıxışçılar ermənilərin vəhşiliyindən, beynəlxalq təşkilatların baş verənlərə ikili standartlarla yanaşmalarından danışıblar.