Daxili siyasət

Ana səhifə

Daxili siyasət

AXCP sədrinin müavini Müsavat Partiyasının ünvanına sərt ittihamlar səsləndirib

28 fevral 2011 15:02 (UTC +04:00)

Bakı. Pərvin Abbasov – APA. “Biz martın 12-də mitinqin keçirilməsinin məqsədəuyğun olması barədə qərarı uzun müzakirələrdən sonra qəbul etdik. Ancaq Bakı Şəhər İcra Hakimiyyətinə mitinqlə bağlı martın 7-də müraciət edəcəyik. Həmin vaxta qədər isə siyasi tərəfdaşlarımızla məsələni müzakirə edəcək, məsləhətləşəcəyik ki, martın 12-də mitinq keçirilməsinin zəruriliyinə onları da inandıraq. Böyük ehtimalla mitinqi birgə keçirəcəyik. Əgər alınmasa, Müsavat mitinqi təkbaşına keçirəcək”. Bunu APA-ya açıqlamasında İctimai Palatanın üzvü, Müsavat Partiyası başqanının müavin Tofiq Yaqublu deyib. O bildirib ki, əgər Bakı Şəhər İcra Hakimiyyəti mitinq keçirilməsinə icazə verməsə, aksiya icazəsiz keçiriləcək: “Böyük ehtimalla icazə verilməyəcək və biz aksiyanı icazəsiz keçirəcəyik”.

T. Yaqublu Müsavat Partiyasının mitinq qərarını İctimai Palatadan kənarda verməsini isə belə əsaslandırıb: “Biz İctimai Palata ilə sıx əməkdaşlıq edirik, mitinq məsələsi Palatanın sonuncu sessiyasında da müzakirə olunub, yekdil qərara gəlinib. Biz İctimai Palatada təmsil olunuruqsa, Müsavat Partiyası olaraq orada qəbul olunan qərarları qəbul etməyə məsuluq. Sadəcə olaraq Müsavat Partiyasının özünün də konkret hədəfləri və görəcəyi işləri var. Gələcəkdə İctimai Palata bizim qərarı dəstəkləsə, lap yaxşı olar. Yəni bunlar bir-birinə mane olan məsələlər deyil”.

İctimai Palatanın üzvü, AXCP sədrinin müavini Razi Nurullayev isə APA-ya açıqlamasında deyib ki, mitinq keçirilməsi məsələsi İctimai Palatanın sonuncu sessiyasında müzakirə olunub və Müsavat Partiyası Mərkəzi İcra Aparatının rəhbəri Arif Hacılının martın 12-də kütləvi aksiya keçirilməsi ilə bağlı təklifi qəbul edilməyib: “Düzdür, mitinq qərarı Müsavat Partiyasının daxili qərarıdır, biz buna bir şey deyə bilmərik. Ancaq Arif Hacılının məlum təklifi İctimai Palatanın iclasında çox cüzi səs topladığı halda Müsavat Partiyasının mitinq qərarı İctimai Palatada müəyyən gərginlik yarada, eyni zamanda, cəmiyyətdə İctimai Palataya inamsızlıq yarada bilər. Belə çıxır ki, mitinq məsələsinə görə İctimai Palatada gərginlik yaranacaqsa, bunun məsuliyyəti Müsavat Partiyasının üzərinə düşəcək. Müsavat Partiyasının təkbaşına mitinq keçirmək istəməsi həm də AXCP-nin hələ 7 noyabr parlament seçkilərindən əvvəl seçdiyi bir taktikadır. Müsavatın indi belə bir qərar verməsini sözün düzü başa düşə bilmirəm və hesab etmirəm ki, Müsavatın bu qərarı ümumi müxalifətçiliyin və demokratik qüvvələrin xeyrinədir. Çünki əgər partiya təkbaşına və az qüvvə ilə mitinqə çıxarsa, yenidən aksiyaçıların tutulması, onların əzilməsi, insanlarda ruhun öldürülməsinin məsuliyyəti birbaşa Müsavat Partiyasının üzərində qala bilər. Biz istəyirik ki, küçələrə çıxan zaman sərbəst toplaşmaq azadlığımızı da təmin edə bilək. Əgər biz bunu etmədən 50-100 nəfərlə çıxırıqsa, polis bizi dağıdırsa, yenidən insanların Yaxın Şərqdə baş verənlər fonunda artan ruhu sındırılırsa, bunun birbaşa məsuliyyəti Müsavat partiyasının üzərində qalacaq”.

R. Nurullayevin sözlərinə görə, böyük ehtimalla AXCP Müsavat Partiyasının martın 12-nə təyin etdiyi mitinqə qoşulmayacaq: “AXCP İctimai Palatanın təyin edəcəyi mitinqdə iştirak edəcək. Əks halda bu, etikadan kənar olardı. Hazırda İctimai Palata bütün müxalifət adından müəyyən məsələləri koordinasiya edir. Müsavatın təkbaşına mitinqlə bağlı qərar qəbul etməsi palatada təmsil olunan digər partiyalara və ictimai təşkilatlara, həmçinin fərdlərə hörmətsizlikdir”.

İctimai Palatanın (İP) Koordinasiya Şurasının üzvü, AMİP sədri Yusif Bağırzadə isə Müsavat Partiyasının mitinq qərarına hörmətlə yanaşdığını, lakin İP-nin sonuncu iclasında dediyi fikirlərin üstündə qaldığını bildirib: “Mən İctimai Palatanın iclasında da dedim ki, mitinq keçirilməsi tezdir”.

İctimai Palatanın Koordinasiya Şurasının üzvü Pənah Hüseyn Müsavat Partiyasının mitinq keçirilməsi qərarı ilə tanış olmadığını bildirib. Bununla yanaşı, o əlavə edib ki, hər bir partiyanın kütləvi aksiya keçirmək səlahiyyəti var: “Bu, hansısa şəkildə məhdudlaşdırılmır”.

Qeyd edək ki, bu gün Müsavat Divanı martın 12-də ümumrespublika mitinqinin keçirilməsinin məqsədəuyğun olması barədə qərar qəbul edib. Həmçinin qərara alınıb ki, mitinq keçirilməsinə 5 gün qalanadək, yəni martın 7-dək siyasi tərəfdaşlarla müzakirələr aparılsın.

AXCP_Müsavat