Daxili siyasət

Ana səhifə

Daxili siyasət

AXCP Rəyasət Heyətinin üzvü: “Pənah Hüseyn KQB agenti, Rauf Arifoğlu isə hakimiyyətin adamıdır”

01 mart 2011 10:20 (UTC +04:00)

Bunu APA-ya açıqlamasında AXCP Rəyasət Heyətinin üzvü Xaliq Bahadır deyib. O, İctimai Palatanın yaranmasında rolu olan şəxslərdən biri olduğunu vurğulayıb: “Ancaq bu ona görə bilinməyib ki, bir çoxları kimi özümü gözə soxmamışam. İctimai Palatanın ilk iclaslarından başlayaraq bir çoxları çalışıblar ki, özlərini elə gözə soxsunlar, guya hər şeyi edən, hər şeyi yaradan bunlardır”.

X. Bahadır İctimai Palatanın (İP) fevralın 26-da keçirilən iclasında Koordinasiya Şurasının tərkibinin genişləndirilməsinə etiraz etməsinin səbəblərini də açıqlayıb: “Mən, ümumiyyətlə, tərkibin genişləndirilməsinə qarşı çıxmışam. İkincisi isə Rauf Arifoğlunun Koordinasiya Şurasında təmsilçiliyinə qarşı olmuşam. Burada gizli nəsə yoxdur, Azərbaycanda siyasi aktivliyi olan adamların hamısı bilir ki, Rauf Arifoğlu hakimiyyətin adamıdır. O, qəzeti ilə birlikdə indiki hakimiyyətə quluq edir. İctimai Palatanın iclasında mənə söz verilsəydi, bunları deyəcəkdim. Çünki mən çarpışmanı açıq aparıram, bir çoxları kimi gizli oyun oynamıram. Ancaq iclasda oyun oynayanlar var idi, ona görə də mənə söz vermədilər. Palatada antidemokratik proses gedir”.

X. Bahadır deyib ki, R. Arifoğlunun İP Koordinasiya Şurasının üzvü olmasında ilk növbədə Pənah Hüseyn maraqlı olub: “Məndən soruşmaq olar ki, Pənah Hüseyni yaxşı tanıyırdımsa, niyə başlanğıcdan buna qarşı çıxış eləmədim? Keçmiş daxili işlər naziri İsgəndər Həmidov mətbuatda da yazmışdı ki, Pənah Hüseyn KQB agentidir, “kliçkası” da Mamedovdur. Mən əvvəldən o səbəbdən çıxış etmədim ki, Pənah Hüseynin Koordinasiya Şurasında bir nəfər olduğunu düşündüm. Ancaq Pənah Hüseyn orada özünə agentura komandası yaratmağa başlayanda, artıq dözmədim. Mən sonadək vuruşacağam. Ya Pənah Hüseynlə Rauf Arifoğlu Koordinasiya Şurasından gedəcək, ya da mən İctimai Palatanı tərk edəcəyəm”.

X. Bahadır Müsavat və AXCP-nin ayrı-ayrılıqda mitinq keçirməsinə də münasibət açıqlayıb: “Ölkənin indiki durumunda öndə gedən iki partiyanın ayrı-ayrılıqda mitinq keçirməsini komediya sayıram. Bu, bir oyundur”.

İP-nin Koordinasiya Şurasının yeni seçilmiş üzvü, “Yeni Müsavat” qəzetinin sahibi və baş redaktoru Rauf Arifoğlu isə APA-ya deyib ki, bu məsələyə münasibət bildirmək istəmir: “Və çox ümid edirəm ki, Xalid bəyin bu cür açıqlamalarına AXCP rəhbərliyi özü münasibət bildirəcək”.

İP-nin Koordinasiya Şurasının üzvü Pənah Hüseyn də APA-ya açıqlamasında bu məsələyə münasibət bildirmək istəmədiyini söyləyib: “Bu məsələyə münasibət bildirməyə ehtiyac duymuram. Xaliq Bahadırın kim olduğu, hansı yazılar yazdığı məlumdur, ona görə şərh verməyi belə layiq görmürəm. Mənə elə gəlir ki, onun psixoloji problemləri var. Məhz buna görə məsələyə münasibət bildirmirəm”.

AXCP_Müsavat