Daxili siyasət

Ana səhifə

Daxili siyasət

Sərdar Cəlaloğlu: “Qarabağ və Respublika Uğrunda Hərəkatın bərpası aktuallığını itirib”

01 mart 2011 12:48 (UTC +04:00)

Bakı. Ramil Məmmədli – APA. “Qarabağ və Respublika Uğrunda Hərəkatın təsisçiləri olan AXCP və Müsavat Partiyası qurumun bərpası prosesində iştirak etmək istəyində olmadığından bu məsələ öz aktuallığını itirib”. Bu sözləri APA-ya açıqlamasında Azərbaycan Demokrat Partiyasının (ADP) sədri Sərdar Cəlaloğlu deyib. O bildirib ki, Qarabağ və Respublika Uğrunda Hərəkat bu şəkildə təsis oluna bilməz: “Çünki onun təsisçilərindən ikisi - AXCP və Müsavat Partiyası bərpa prosesində iştirakdan imtina edib. Hesab edirəm ki, Qarabağ və Respublika Uğrunda Hərəkatın təsisçiləri ya İctimai Palatada birləşə, ya da hansısa siyasi qurum yarada bilərlər. Çünki hərəkatın təsisçiləri yekun olaraq qurumun bərpasına hazır deyillər”.

S. Cəlaloğlu qeyd edib ki, Vətəndaş və İnkişaf, Liberal partiyaları hərəkatın bərpasının üzərində dayanırlar: “Ancaq hesab edirəm ki, biz hər hansı məsələyə effektivlik baxımından yanaşmalıyıq. Bu hərəkatın iki əsas qüvvəsi bərpa prosesində iştirak etmirsə, bərpa hərəkatın real gücünü ortaya çıxara bilməyəcək. Ona görə də hərəkatın bu şəkildə bərpası geriyə doğru addım olacaq. Dünyada baş verənlərə uyğun şəkildə yeni inqilabi situasiyaya uyğun ideyalar reallaşdırmalıyıq. Yəni artıq cəbhələşmənin, müxtəlif mərkəzlərin yaradılmasının və ya uzunmüddətli siyasi əməkdaşlığın modelləri əvəzinə ekstremal situasiya üçün daha çevik, güclü və vahid mərkəzin yaradılması vacibdir. Bunu İctimai Palatanın bazasında yaratmaq olar. Çox təəssüf ki, İctimai Palatanın təsisçiləri bu ideyaya hər hansı təkan verməyi belə yaxına buraxmırlar. Bəzi adamlar formaya o qədər aludədirlər ki, məzmun onlar üçün ikinci dərəcəyə keçir. Hər halda hadisələr prosesi düzgün yönəldəcək”.

Vətəndaş və İnkişaf Partiyasının (VİP) sədri Əli Əliyev isə hərəkatın bərpası təklifinin Sərdar Cəlaloğlundan gəldiyini xatırladıb: “Biz digər iki təsisçi ilə münasibətlərimizin necə olmasını da əvvəlcədən müəyyənləşdirmişdik. Daxili müzakirələrdə isə hərəkatın bərpasını elan etməmişdən əvvəl digər təsisçilərə etika məqsədilə müraciət etmək barədə təklif qəbul olunmuşdu. “Gələrlərsə hərəkat tam tərkibdə bərpa olunar, gəlməzlərsə özümüz bərpa edərik” kimi mövqe var idi. Bundan sonrakı mərhələdə isə biz danışıq apardığımız tərəfin daha çox İctimai Palataya can atdığının şahidi olduq. Digər tərəfin hərəkatın bərpasından çox İctimai Palatada təmsilçilik hüququ əldə etmək istəyi daha qabarıq görünürdü. Bu, bir növ hərəkatın bərpasından daha çox “Qarabağ” blokunun İctimai Palatada təmsilçilik hüququ əldə etmək istəyinə bənzəyirdi. Sanki danışıqlar gedə-gedə Sərdar Cəlaloğlunun mövqeyi hərəkatın bərpasından çox, İctimai Palatada təmsilçiliyə transformasiya olundu. Səbəbini izah edə bilmərəm”.

Ə. Əliyev bildirib ki, hər bir halda S. Cəlaloğlunun mövqeyinə hörmətlə yanaşır: “Sərdar Cəlaloğlu hesab edirsə ki, hərəkatın bərpa perspektivi tükənib, buna hörmətlə yanaşırıq. Amma qeyd edim ki, hərəkatın bərpası da bizim üçün həyat əhəmiyyətli deyildi”.

sərdar_cəlaloğlu