Daxili siyasət

Ana səhifə

Daxili siyasət

Ötən il Ombudsman Aparatına daxil olan şikayətlərin sayı 2009-cu illə müqayisədə xeyli artıb

01 mart 2011 15:09 (UTC +04:00)

Bakı. Rəşad Süleymanov – APA. Azərbaycan Ombudsmanının 2010-cu ildəki fəaliyyətinə dair hesabatı Milli Məclisə daxil olub. APA-nın Milli Məclisdən əldə etdiyi məlumata görə, artıq hesabatın mətni tanış olmaları üçün deputatlara paylanılıb. Ombudsman Elmira Süleymanova isə martın 4-də parlament qarşısında illik hesabat verəcək.

Hesabatda qeyd olunub ki, Müvəkkilin fəaliyyəti dövründə onun ünvanına ümumilikdə 62720 müraciət daxil olub. 2010-cu il ərzində daxil olan şikayətlərin sayı 2009-cu illə müqayisədə 32,5% artıb. Belə ki, 2009-cu ildə Müvəkkilin ünvanına 8 800 müraciət daxil olduğu halda 2010-cu ildə bu rəqəm 11 660 təşkil edib. Qeyd edilən müraciətlərin 84,2%-i şikayətlərdən, 15,7%-i ərizələrdən, 0,1%-i isə təkliflərdən ibarət olub.

Müvəkkil Konstitusiya Qanununun tələblərinə müvafiq olaraq, şikayətlərin onun səlahiyyətlərinə aid olmaması, ərizəçinin hüquqlarının pozulduğu gündən bir ildən çox müddət keçməsi, anonim olması, şikayətlə bağlı məhkəmə icraatı getməsi, təkrar təqdim edilmiş şikayətdə yeni məlumatlar, faktlar və sübutlar olmaması səbəbindən 48,8%-nin baxılmasından imtina edib. Hansı ki, bunlardan 1199 şikayət Müvəkkilə təkrar təqdim edilib. Şikayətlərin 51,2%-i baxılmaq üçün icraata qəbul edilib, bunların da 52,6%-i təmin olunub.

«Şikayətlərdən görünür ki, ərazisində qəzalı vəziyyətə düşmüş yaşayış binaları olan bəzi yerli icra hakimiyyəti orqanları baş verə biləcək təhlükənin qarşısının alınması məqsədilə yuxarı qurumlara, habelə əlaqədar dövlət orqanlarına məsələni ciddi şəkildə təqdim etmək əvəzinə, yalnız məktub göndərməklə kifayətləniblər. Digər tərəfdən, belə məktubların ünvanlandığı qurumlar tərəfindən maliyyə vəsaitinin ayrılmaması və ya gec ayrılmasının hansı nəticələrə səbəb olacağı da bu qurumları narahat etməyib, zərərçəkənlərə yalnız məhkəməyə müraciət etmək tövsiyə olunub», - deyə hesabatda qeyd edilib.

Vicdan, dini etiqad və əqidə azadlığının təmin edilməsi sahəsində vəziyyət də ötən il müvəkkilin diqqətində olub. Ötən il vicdan azadlığının pozulması ilə bağlı müvəkkilin ünvanına 124 şikayət daxil olub və hər biri araşdırılıb. Müvəkkil Sumqayıt Dövlət Universitetinin hicab örtən tələbələrinin dərslərə buraxılmaması ilə bağlı ünvanına daxil olmuş şikayətlər üzrə araşdırmalar aparıb. Maneələrin aradan qaldırılması ilə bağlı əlaqədar vəzifəli şəxslərə qanunvericiliyə əsaslanmaqla zəruri tövsiyələr verib. Müvəkkilin müdaxiləsindən sonra qeyd edilən problem öz həllini tapıb.

2010-cu ildə müvəkkilin ünvanına yerli icra hakimiyyəti orqanları ilə bağlı 1 014 (10,3%) o cümlədən Sabirabaddan 53, Şəkidən 44, İmişlidən 38, Ağcabədidən 29, Kürdəmirdən 26 şikayət daxil olub.

Ombudsman qeyd edib ki, əhalinin təhlükəsiz yaşamaq hüququnun təmin edilməsində ciddi narahatlıq yaradan məsələlərdən biri də yaşayış evlərinə yaxın yerlərdə yanacaqdoldurma məntəqələrinin fəaliyyət göstərməsidir. Monitorinqlər göstərib ki, iri yaşayış məntəqələrində, xüsusilə də Bakı şəhərində, respublika tabeli şəhərlərdə və rayon mərkəzlərində, habelə magistral yolların üstündə yerləşən qəsəbə və kəndlərdə yaşayış evlərinə və ictimai binalara yaxın məsafələrdə belə yanacaqdoldurma məntəqələrinin istifadəyə verilməsi həmin ərazilərdə yaşayan insanların həyatı, sağlamlığı və əmlakı üçün ciddi təhlükə yaratmaqdadır. Ona görə də müvafiq səlahiyyətli orqanlar tərəfindən mövcud normativlər nəzərə alınmadan belə məntəqələrin açılmasına razılıq verilməsinin qarşısının alınması tövsiyə olunur.