Daxili siyasət

Ana səhifə

Daxili siyasət

Daxili İşlər Nazirliyi Dəyanət Babayevin həbsinə və Bəxtiyar Hacıyevin açıqlamalarına münasibət bildirib

07 mart 2011 16:10 (UTC +04:00)

Bakı. Hafiz Heydərov, Pərvin Abbasov - APA. Daxili İşlər Nazirliyi AXCP Gənclər Komitəsinin üzvü Dəyanət Babayevin həbsinə və deputatlığa keçmiş namizəd Bəxtiyar Hacıyevin açıqlamalarına münasibət bildirib. Nazirliyin Mətbuat Xidmətinin şöbə rəisi Orxan Mansurzadə APA-ya açıqlamasında bildirib ki, Dəyanət Babayev martın 4-də ictimai yerdə asayişi kobud şəkildə pozduğu, polisin onu intizama dəvət etmək tələblərinə məhəl qoymadığı üçün saxlanılaraq Nəsimi Rayon Polis İdarəsinin 22-ci Polis Bölməsinə gətirilib. Burada onun barəsində İnzibati Xətalar Məcəlləsinin 310.1-ci maddəsinə uyğun olaraq protokol tərtib edilib və baxılması üçün aidiyyəti üzrə rayon məhkəməsinə göndərilib. Nəsimi Rayon Məhkəməsi tərəfindən onun barəsində 10 sutkalıq inzibati həbs qərarı çıxarılıb. D. Babayev ifadəsində ictimai asayişi pozduğunu və polisinin qanuni tələblərinə tabe olmadığını etiraf edib.

O. Mansurzadə, həmçinin barəsində 1 aylıq həbs qərarı verilmiş Bəxtiyar Hacıyevin açıqlamalarına da münasibət bildirib. O qeyd edib ki, B. Hacıyev polis şöbəsində guya işgəncəyə məruz qalması ətrafında şou yaradıb: “Onun polis şöbəsində olduğu müddətdə guya işgəncəyə məruz qalması haqda yaydığı məlumatların heç bir əsası yoxdur. Burda məqsəd həqiqətdən uzaq, qərəzli məlumatlar yaymaqla ictimaiyyətin diqqətini bir daha özünə cəlb etməkdən ibarətdir”.

Qeyd edək ki, bir neçə gün əvvəl barəsində həbs-qətimkan tədbiri seçilmiş B. Hacıyev aclıq aksiyasına başlayıb. O, aclığa başlamasını ona qarşı işgəncə və qeyri-insani rəftarla bağlı olduğunu bildirir.

B. Hacıyevin vəkili Elçin Namazov isə APA-ya bildirib ki, Gəncə şəhəri Kəpəz rayonu 2 saylı İstintaq Təcridxanasında saxlanılan deputatlığa sabiq namizəd Bəxtiyar Hacıyevin həbsi ilə bağlı qərardan apellyasiya şikayəti verilib. Vəkilin sözlərinə görə, B. Hacıyev dostlarının və onu dəstəkləyən gənclərin xahişini nəzərə alaraq aclıq aksiyasını dayandırıb: “Lakin dedi ki, apelyasiya məhkəməsinin qərarı mənfi olarsa, yenidən ölüm aclığına başlayacaq”.

Vəkil B. Hacıyevlə bu gün iki dəfə görüşdüyünü, onun polislər tərəfindən döyülməsi ilə bağlı ekspertiza təyin olunduğunu deyib. O, həkim müayinəsinin keçirildiyini və müayinənin nəticəsinin aktlaşdırıldığını qeyd edib.

Vəkil B. Hacıyevin döyülməsi iddiası ilə bağlı Gəncə Şəhər Prokurorluğuna müraciət edildiyini də vurğulayıb. Bu işlə bağlı artıq müstəntiq təyin olunub.

Qeyd edək ki, martın 4-də Gəncə şəhər Nizami Rayon Məhkəməsinin qərarı ilə B. Hacıyev barəsində bir aylıq həbs-qətimkan tədbiri seçilib. O, Gəncəni icazəsiz tərk etməkdə təqsirləndirilir.

B. Hacıyev barəsində Cinayət Məcəlləsinin 321.1 (qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma) maddəsi ilə yanvarın 24-də Gəncə şəhər Prokurorluğunda cinayət işi başlanıb.