Daxili siyasət

Ana səhifə

Daxili siyasət

Bəzi siyasi partiyalarının rəhbərləri ATƏT-in fəaliyyətdə olan sədri ilə görüşdə iştirak etməyiblər

14 mart 2011 09:37 (UTC +04:00)

Bakı. Ramil Məmmədli - APA. Azərbaycanın bəzi siyasi partiyalarının rəhbərləri Bakıda səfərdə olan ATƏT-in fəaliyyətdə olan sədri, Litvanın xarici işlər naziri Audronyus Ajubalislə görüşdə iştirak etməyiblər. Azərbaycan Xalq Partiyasının (AXP) nümayəndəsi, sabiq deputat Pənah Hüseyn APA-ya bildirib ki, görüşlə bağlı dəvətnamə ona çatmayıb: “ATƏT-in Bakı ofisindən dəvət edəcəklərini demişdilər. Ola bilər hansısa səbəblərdən mənə məlumat verilməyib. Sonradan zəng olunmadı, mən də məlumatı mətbuatdan oxumuşam”.

Dəvətlilər arasında olan Vətəndaş Birliyi Partiyasının (VBP) sədri Sabir Hacıyev isə xarici səfərdən dünən döndüyünü və bu səbəbdən də görüşdən məlumatsız olduğunu söyləyib: “İndi Şamaxıda ermənilərin törətdiyi soyqırımla bağlı beynəlxalq tədbirdəyəm. Mənə martın 7-də keçirilməsi planlaşdırılan tədbir üçün dəvətnamə göndərilmişdi. Sonradan həmin görüş qeyri-müəyyən vaxta qədər təxirə salındı. Bu gün keçirilən görüş barədə isə məlumat almamışam”.

Ana Vətən Partiyasının (AVP) sədri Fəzail Ağamalı ATƏT-in Bakı ofisindən dəvət almadıqlarını bəyan edib: “ATƏT-in Bakı ofisində ATƏT-in fəaliyyətdə olan sədri Audronyus Ajubalisin Azərbaycandakı siyasi partiyaların rəhbərləri ilə görüşünə Ana Vətən Partiyasının dəvət olunması haqqında verilən məlumatlar yanlışdır. Partiyanın sədrinə və Mərkəzi Aparatına bugünkü görüş haqqında heç bir şifahi və yazılı məlumat verilməyib”.

Böyük Quruluş Partiyasının (BQP) Məclis sədri Əjdər Əliyev isə bildirib ki, partiya başqanı Fazil Mustafa tədbirə dəvətli olsa da, Türkiyə səfərdə olduğundan görüşə qatıla bilməyib.

Müxalifət düşərgəsində təmsil olunan Azərbaycan Demokrat və Milli İstiqlal partiyalarının sədrləri dəvət olunmamalarının səbəbini ATƏT-in Bakı ofisindən soruşmağı məsləhət görüblər. ADP sədri Sərdar Cəlaloğlu deyib ki, görüşə dəvət olunmayıblar və bunun səbəbini izah edə bilməyəcək. AMİP sədri Yusif Bağırzadə isə bildirib ki, görüşə dəvət edilməyiblər və bunun səbəbi də onlar üçün maraqlı deyil: “Görüş onlar tərəfindən təşkil edildiyindən formatı da ATƏT müəyyənləşdirib. Bu səbəbdən də görüşdə iştirak etməməyimizin səbəblərini araşdırmaqda maraqlı deyilik”.

Qeyd edək ki, ATƏT sədri ilə görüşə Demokratik İslahatlar Partiyasının sədri Asim Mollazadə, Sosial Rifah Partiyasının sədri Xanhüseyn Kazımlı, Ədalət Partiyasının sədri İlyas İsmayılov, BAXCP sədri Qüdrət Həsənquliyev, YAP sədrinin müavini, partiyanın icra katibi Əli Əhmədov, Müsavat başqanı İsa Qəmbər, AXCP sədri Əli Kərimli, ALP sədri Əvəz Temirxan və Ümid Partiyasının sədri İqbal Ağazadə qatılıb.

ATƏT_Sədr