Daxili siyasət

Ana səhifə

Daxili siyasət

Bir qrup qeyri-hökumət təşkilatları mitinqlərin əleyhinə çıxıb

14 mart 2011 14:40 (UTC +04:00)

Bakı. Ramil Məmmədli – APA. Azərbaycanda müdafiə və təhlükəsizlik, hərbi vətənpərvərlik, əlil və veteranlarla iş sahəsində fəaliyyət göstərən bir qrup qeyri-hökumət təşkilatı toplantı keçirib. APA-nın məlumatına görə, toplantıda 9 yaşlı Fariz Bədəlovun Ermənistan ordusu tərəfindən qətlə yetirilməsi və müxalifət düşərgəsində təmsil olunan bir qrup partiyanın keçirdiyi aksiya müzakirə mövzusu olub.

“Tərxis olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli deyib ki, Ermənistan rəhbərliyi, əsasən də Serj Sarkisyan və keçmiş prezident Robert Köçəryanın əlləri minlərlə dinc azərbaycanlının qanına batıb. O hesab edir ki, ötən həftə küçələrə çıxaraq etiraz aksiyası keçirmək istəyən gənclər ABŞ-ın, Fransanın, Rusiyanın səfirliyi önünə toplaşaraq bu ölkələrin ikili standartlarına etiraz etməli olduqları halda, ölkədə qarışıqlıq yaratmaq istəyiblər: “Azərbaycanın elə qonşuları var ki, ölkədə baş verən qarşıdurmadan istifadə edib ərazilərimizi işğal etmək fürsətini gözləyir”.

“Əsgər anaları” İctimai Birliyinin sədri Leyla Gərayzadə Azərbaycanın inkişaf etməkdə olan ölkəyə çevrildiyini bildirib: “Mən onlara müraciət edirəm. Niyə gəncləri təhsilə, elmə yönəltmək əvəzinə küçələrə çıxardırsınız? Həmin müxalifət partiyasının fəaliyyətini “düşmən dəyirmanına su tökmək” kimi qiymətləndirirəm”.

“Milli Qəhrəmanları Tanıtım” İctimai Birliyinin sədri Elşən Məmmədov isə müxalifətin indiyə qədər Qarabağ problemi haqqında və Ermənistan əleyhinə mitinq keçirmədiyini xatırladıb.

Toplantı ictimai təşkilatların nümayəndələrinin mövzuya dair çıxışları ilə davam etdirilib. Sonda 20-yə yaxın təşkilat adından Azərbaycan prezidenti, Silahlı Qüvvələrin Ali Baş Komandanı İlham Əliyevə müraciət ünvanlanıb. Müraciətdə bildirilib ki, Azərbaycan ictimaiyyətinin əksər hissəsi kimi, onlar da hazırda ölkədə hökm sürən ictimai-siyasi sabitliyə və əldə olunan iqtisadi inkişafa kölgə salmağa çalışan bir qrup insanın fəaliyyətini qətiyyətlə pisləyir, onların qarşısının alınması yönündə dövlət tərəfindən görülən tədbirləri dəstəkləyir.