Daxili siyasət

Ana səhifə

Daxili siyasət

Azərbaycanın müxalifət partiyasının sədri: “İlk mərhələdə 8 partiyanın bir araya gəlməsini təklif edirik”

15 mart 2011 14:09 (UTC +04:00)

Bunu APA-ya açıqlamasında Vətəndaş və İnkişaf Partiyasının (VİP) sədri Əli Əliyev deyib. Ə. Əliyev bildirib ki, müxalifətin inteqrasiyasına nail olmaq məqsədilə Ümid, Demokrat, Klassik Xalq Cəbhəsi və Milli İstiqlal partiyalarının rəhbərləri ilə görüşlər keçirilib. AXCP və Müsavat Partiyasının rəhbərləri ilə görüş üçün isə yazılı müraciət göndəriləcək: “Onların 8 partiya formatında müxalifətin əsas qüvvələrinin bir araya gəlməsi məsələsinə münasibətlərini öyrənmək istəyirik. Artıq KXCP sədri Mirmahmud Mirəlioğlunun razılığını almışıq”.

Ə. Əliyev formatın seçilməsində müəyyən meyarların nəzərə alındığını da söyləyib: “Ümid, Demokrat, Klassik Xalq Cəbhəsi, Milli İstiqlal, Xalq Cəbhəsi və Müsavat partiyaları son parlament seçkisinə öz namizədlər korpusu ilə qatılıb. Son seçkilər göstərib ki, bu 8 partiyanın Azərbaycanın bütün bölgələrini əhatə edən təmsilçilik imkanları, seçkilərdə hakimiyyətlə mübarizə aparmaq üçün namizədlər korpusu və əhalidən aldığı səslər var. Müxalifətin daha geniş birliyinə nail olmaq üçün 1-ci mərhələdə bu 8 partiyanın birgə görüşünün keçirilməsi zəruridir. Müxalifət düşərgəsinə daxil olan digər siyasi partiyaların, müxalifəti dəstəkləyən QHT-lərin, ictimai-siyasi xadimlərin, müstəqil namizədlərin də prosesdə iştirakını təmin edəcək formatın əldə edilməsi üçün məsləhətləşmələr aparılması isə bu görüşlərdə təklif olunacaq”.

Təkliflərinin heç bir halda İctimai Palataya alternativ olmadığını deyən Ə. Əliyev bildirib ki, İctimai Palata 2 partiyanın, ən yaxşı halda isə 3 partiyanın rəsmi müdafiə etdiyi və təsisçisi olduğu qurumdur: “Müxalifətin əməkdaşlığının daha effektli formatı bizim təklif etdiyimiz prinsip əsasında olacaq. Bununla müxalifətin bir arada olması mesajını vermək istəyirik. Əgər müxalifətin əsas, sonra isə digər qüvvələri bir araya gələrsə, siyasi müstəvidə iki qütblük yarada bilərik - müxalifəti və YAP-ı dəstəkləyənlər. Bununla da siyasi arenada şəffaflıq əldə etmiş olarıq. İlkin siyasi hədəfimiz bundan ibarətdir”.