Daxili siyasət

Ana səhifə

Daxili siyasət

YAP Gənclər Birliyinin sədri: “Biz xaricdən idxal olunan dağıdıcı ideologiyaların daşıyıcısına çevrilmiş gəncləri qəbul etmirik”

18 mart 2011 13:16 (UTC +04:00)

APA-nın xəbərinə görə, bunu Yeni Azərbaycan Partiyasının (YAP) saytına müsahibəsində partiyanın Gənclər Birliyinin sədri Seymur Orucov deyib. O bildirib ki, həmin qüvvələr ərəb dövlətlərində baş vermiş hadisələri Azərbaycana transformasiya etməyə cəhd göstərir: “Çox təəssüflər olsun ki, ölkəmizdə onlara xidmət edənlər də tapılır”.

S. Orucovun sözlərinə görə, radikal müxalifət gəncləri itaətsizliyə çağırır, xüsusilə universitetlərdə təhsil alan gənclərdən istifadə etməyə cəhd edir: “Biz gənclər radikal müxalifətə sual edirik: nə üçün bizim gələcəyimizi sonu görünməyən tunelə salmağa çalışırsınız? Niyə imkan vermirsiniz ki, bizim üçün yaradılmış şəraitdən maksimum şəkildə yararlanaq və dövlətimizə layiq vətəndaş olaq? Hansı səbəblərə görə, siz bizləri meydana çıxarıb Vətən xaini etməyə cəhd göstərirsiniz? Radikallar və onların xidmət etdikləri qərəzli qüvvələr bilsinlər ki, Azərbaycan gəncləri dövləti hər bir şeydən uca tutur və onun inkişafı üçün əlindən gələni etməyə hazırdır. Bu gün biz gənclərin düşmən mətbəxində hazırlanmış siyasi oyunların baş tutması üçün mitinqlərə çıxan vaxtımız deyil. Hazırda bizim əsas vəzifəmiz dövlət başçısının siyasətini dəstəkləməklə, torpaqlarımızın işğaldan azad olunması üçün səfərbər olmalı, ideoloji cəhətdən silahlanmalıyıq. Bizə ermənilərlə işbirliyində olmuş Ruslan Bəşirli kimi gənclər lazım deyil. Biz xaricdən idxal olunan dağıdıcı ideologiyaların daşıyıcısına çevrilmiş gəncləri qəbul etmirik. Həmin gənclər Azərbaycan gəncliyinin adına ləkə salırlar”.