Daxili siyasət

Ana səhifə

Daxili siyasət

Müsavat Partiyası Divanının növbəti toplantısı keçirilib

23 mart 2011 15:37 (UTC +04:00)

Bakı - APA. Bu gün Müsavat Partiyası Divanının növbəti toplantısı keçirilib. Partiyanın mətbuat xidmətindən APA-ya verilən məlumata görə, iclasda qərarların icrası, görülən işlər, partiyadaxili və ictimai-siyasi vəziyyətə dair məsələlərə baxılıb.

Yığıncağın əvvəlində partiya rəhbərliyinin Cəfər Cabbarlının doğum günü münasibətilə martın 21-də Fəxri Xiyabanda onun, Əbülfəz Elçibəyin, Üzeyir Hacıbəylinin və Şıxəli Qurbanovun məzarlarını ziyarət etdiyi haqda məlumat verilib.

Daha sonra 11 və 12 mart aksiyaları zamanı həbs olunanların hamısının azad olunduğu qeyd edilib. Həbs olunan aksiya iştirakçılarının hüquqlarının müdafiəsini həyata keçirmiş hüquq müdafiəçilərinin və vəkillərin rolu dəyərləndirilib.

Müsavat Partiyası Məclisinin martın 26-da keçiriləcək sessiyasına hazırlığın gedişi müzakirə edilib və gündəlik layihəsi təsdiq edilib.

31 mart soyqırımı günü münasibətilə İctimai Palata çərçivəsində Şəhidlər Xiyabanının saat 12:00-da ziyarət ediləcəyi haqda məlumat verilib.

Daha sonra 2 aprel mitinqinə hazırlıqla bağlı müzakirələr aparılıb və müvafiq partiya strukturlarına konkret göstərişlər verilib.

Sonda cari məsələlərə baxılıb.