Daxili siyasət

Ana səhifə

Daxili siyasət

Arif Hacılı: “Bakı Şəhər İcra Hakimiyyətinin İctimai Palatanın aprelin 2-nə təyin etdiyi mitinqə icazə verəcəyinə ciddi ümidlər bəsləyirəm”

28 mart 2011 13:41 (UTC +04:00)

Bakı. Pərvin Abbasov – APA. “Bakı Şəhər İcra Hakimiyyətinin İctimai Palatanın aprelin 2-nə təyin etdiyi mitinqə icazə verəcəyinə ciddi ümidlər bəsləyirəm. Yaxşı olardı ki, ciddi toqquşmalar, qarşıdurmalar olmaması üçün aprelin 2-nə təyin olunmuş aksiyanın keçirilməsinə icazə verilsin”. Bunu APA-ya açıqlamasında İctimai Palataya (İP) daxil olan Müsavat Partiyası Mərkəzi İcra Aparatının rəhbəri Arif Hacılı deyib.

O, Bakı Şəhər İcra Hakimiyyətinə (BŞİH) kütləvi aksiya keçirməklə bağlı hələ 9 günlük qeyri-iş günündən əvvəl, martın 18-də müraciət etdiklərini xatırladıb: “Orada göstərmişik ki, aksiyanın təyin olunduğu günə ən azı üç gün qalmış bizə cavab verilməlidir. Müraciət olunandan ötən müddət ərzində qeyri-iş günləri olduğu üçün çox güman ki, Bakı Şəhər İcra Hakimiyyəti bu məsələni müzakirə etməyib. Güman edirik ki, onlar bizə uzaqbaşı martın 29-da cavab verəcəklər”.

Qeyd edək ki, İP nümayəndələri adından BŞİH-ə göndərilən müraciətdə demokratik islahatlar aparılması, söz azadlığının təmin edilməsi, növbədənkənar parlament seçkilərinin keçirilməsi, Qarabağa azadlıq və s. şüarları ilə “Nərimanov” kinoteatrının qarşısındakı meydanda kütləvi etiraz aksiyasının keçiriləcəyi bildirilib. 5 min nəfərin qatılması nəzərində mitinqin saat 14.00-dan 16.00-dək keçirilməsi planlaşdırılır. İP Koordinasiya Şurasının qərarına əsasən, BŞİH “Nərimanov” kinoteatrının qarşısındakı meydanda mitinq keçirməyə icazə verməsə, aksiya Bakının mərkəzi yerlərindən olan “Fəvvarələr meydanı”nda keçiriləcək.

İP_mitinq