Daxili siyasət

Ana səhifə

Daxili siyasət

Azərbaycan Demokrat Partiyasının üzvü polis tərəfindən saxlanılıb

29 mart 2011 14:52 (UTC +04:00)

Bakı. Ramil Məmmədli – APA. Azərbaycan Demokrat Partiyasının (ADP) Nərimanov rayon təşkilatının fəalı Nazim Abbaslı polis tərəfindən saxlanılıb. ADP-nin mətbuat xidmətindən APA-ya bildirilib ki, Nərimanov Rayon Polis İdarəsinin əməkdaşları tərəfindən bu gün saxlanılan N. Abbaslı polisə müqavimət göstərməkdə ittiham edilərək, Nərimanov Rayon Məhkəməsinin qərarı ilə 5 sutka inzibati qaydada azadlıqdan məhrum edilib. N. Abbaslı artıq Bakı Şəhər Baş Polis İdarəsinin Binəqədidəki saxlama təcridxanasına köçürülüb. Məlumatda o da qeyd olunub ki, N. Abbaslı haqda məhkəmənin qərarı qeyri-qanunidir, çünki o, polisə müqavimət göstərməyib. ADP N. Abbaslının İctimai Palatanın aprelin 2-nə təyin etdiyi kütləvi aksiya ilə bağlı saxlanıldığı qənaətindədir.

Nərimanov Rayon Məhkəməsindən isə APA-ya bildirilib ki, Nazim Abbaslı İnzibati Xətalar Məcəllənin 310-cu (polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə) maddəsi ilə ittiham olunaraq barəsində 5 sutka müddətində inzibati həbs tətbiq olunub. İttihama görə, N. Abbaslı Bakıda çalışdığı şirkətlərin birində baş verən oğurluq hadisəsi ilə bağlı istintaqda ifadə verməyə çağırılıb. Lakin o, istintaqdan yayınıb, o cümlədən ifadə vermək üçün onu rayon Polis İdarəsinə dəvət edən polis əməkdaşlarına müqavimət göstərib.