Daxili siyasət

Ana səhifə

Daxili siyasət

Qərbi Azərbaycandan olan bir qrup ziyalı toplantı keçirib

30 mart 2011 11:35 (UTC +04:00)

Bakı. Ramil Məmmədli – APA. Qərbi Azərbaycandan olan bir qrup ziyalı Dağlıq Qarabağ münaqişəsinin həlli prosesinə həsr olunmuş toplantı keçirib. APA-nın məlumatına görə, professor Firudin Cəlilov deyib ki, Dağlıq Qarabağ münaqişəsinin həlli istiqamətində aparılan danışıqlarda dövlət maraqlarına xələl gətirən məqamlar ortaya çıxıb. O, Qərbi Azərbaycandan olan soydaşlarımızın adından toplantı iştirakçıları tərəfindən ATƏT-in Minsk Qrupu həmsədrlərinə müraciət ünvanlanmasının vacibliyini diqqətə çatdırıb.

Politoloq Eldar Namazov müraciətin məğzi barədə məlumat verib. O bildirib ki, Qərbi Azərbaycandan olan azərbaycanlılardan ibarət nümayəndə heyətinin həmsədrlərlə, BMT və digər beynəlxalq təşkilat təmsilçiləri ilə görüşləri nəzərdə tutulub: “Lazım gələrsə, məsələ ilə bağlı Milli Məclisdə qanunvericilik təşəbbüsü ilə də çıxış etmək nəzərdə tutulub”.

Azərbaycan Dövlət Tibb Universitetinin professoru Eldar Abbasov dövlətə söykənərək bu işlərin görülməsinin məqsədəuyğunluğunu söyləyib: “Beynəlxalq səviyyədə mücadilə aparılması üçün bir hərəkatın və ya təşkilatın yaradılmasına ehtiyac var”.

Dünya Azərbaycanlıları Konqresinin həmsədri, oftalmoloq-alim Paşa Qəlbinur da bu təklifi dəstəkləyərək, məsələ ilə əlaqədar diaspora təşkilatları ilə müzakirələr aparacağını qeyd edib.

Ziyalı Nurəddin Mustafayev, keçmiş baş prokuror Əli Ömərov, şair Vahid Əziz, jurnalist Tapdıq Fərhadoğlu, sabiq polis rəisi Köçəri Nağıyev, politoloq Qabil Hüseynli, jurnalist Mahal İsmayıloğlu, şair Eldar İsmayıl da çıxışlarında təşkilatlanmanın zəruriliyini vurğulayıblar.

Sonda ATƏT-in Minsk Qrupunun həmsədrlərinə müraciət qəbul olunub.