Daxili siyasət

Ana səhifə

Daxili siyasət

1918-ci ildə ermənilər Şamaxı qəzasının Abdulyan nahiyəsinin 69 kəndində yüzlərlə insanı qətlə yetiriblər

31 mart 2011 09:44 (UTC +04:00)

Hacıqabul. Əlibәy Zeynallı - APA. Hacıqabulun Şəhidlər Xiyabanında 31 mart – Azərbaycanlıların soyqırım gününə həsr olunmuş tədbir keçirilib. Hacıqabul rayon İcra Hakimiyyətinin mətbuat xidmətinin rəhbəri Əsabir Məmmədov APA-nın Mil-Muğan bürosuna bildirib ki, abadlaşdırılmış Şəhidlər Xiyabanında yeni xatirə kompleksinin açılışı olub. Xatirə kompleksi 20 yanvar, Qarabağ şəhidləri və Hacıqabul rayonu ərazisində soyqırıma məruz qalmış insanların xatirəsini əbədiləşdirmək üçün qurulub.

Hacıqabul rayon Tarix Memarlıq Qoruğunun direktoru Mübariz Xəlilov deyib ki, onun rəhbərlik etdiyi idarədə saxlanılan istintaq materiallarında Hacıqabul rayonunda baş verən soyqırım haqqında dəhşətli faktlar əksini tapıb. Həmin vaxtlar ermənilər kəndlərdə əhaliyə müxtəlif işgəncələr veriblər. Kənd sakinlərinin kürəklərinə isti samovarlar bağlayaraq onları qaçmağa məcbur ediblər. Məşhur seyid ailəsinin üzvləri olan gəlin və baldız 3 azyaşlı uşaqla birlikdə namuslarını qorumaq üçün özlərini kəndin nohuruna ataraq intihar ediblər.

1918-ci ildə indiki Hacıqabul rayonu ərazisində, əvvəllər isə Bakı quberniyasının Şamaxı qəzasının Abdulyan nahiyəsinin 69 kəndində ermənilər yüzlərlə insanı qətlə yetiriblər. Nəvahi kəndində 955 yerli sakin öldürülüb. Onlardan 555-i kişi, 260-ı qadın, 140-ı uşaq olub. Qubalı-Baloğlan kəndində 250 kişi, 150 qadın və 135 uşaq qətlə yetirilib. Padar kəndində 80, Abdulyan kəndində 80, Meyniman kəndində 43, Rəncbər kəndində 137, Paşalıda 50 və Şorbaçıda 40 nəfər öldürülüb. Ermənilərin törətdiyi vəhşiliklərə daşnak ordusunun rəhbərlərindən biri olan Stepan Lalayan rəhbərlik edib. Ermənilər 10 min iri buynuzlu, 15 min xırda buynuzlu heyvanı, taxıl və ərzaq anbarlarını talayaraq aparıblar.

31_mart