Daxili siyasət

Ana səhifə

Daxili siyasət

Müsavat Məclisinin sədri: “İqbal Ağazadə İctimai Palataya üzv olmaq üçün deputat mandatından imtina etməlidir”

07 aprel 2011 14:59 (UTC +04:00)

Müsavat Partiyası Məclisinin sədri Arzu Səmədbəyli APA-ya bildirib ki, İP, əsasən parlamentin legitimliyini tanımayan və seçkidə qanunsuzluqlarla üzləşən şəxslərin təsis etdiyi qurumdur. Ümid Partiyasının sədri İqbal Ağazadə isə bu seçkidə zərərçəkmiş şəxs kimi təqdim oluna bilməz: “İqbal Ağazadə deputat mandatı alıb və nəticədən də narazı deyil. ADP sədri Sərdar Cəlaloğlunun İctimai Palataya gəlməsində elə bir problem yoxdur. Sadəcə olaraq bir blokda təmsil olunduqlarına görə, İqbal Ağazadənin də İctimai Palatada olmasını israr edir”. Məclis sədri vurğulayıb ki, İ. Ağazadənin İP-də təmsil olunması üçün hüquqi baza olmalıdır: “Əgər İqbal Ağazadə mandatdan imtina etsə, parlamentin legitimliyini qəbul etmədiyini bəyan etsə, İctimai Palatanı təsis edənlərlə həmfikir olsa, onun bu qurumda təmsilçiliyində bir problem olmaz”.

İP-in Koordinasiya Şurasının üzvü Ədalət Yusifov və AXCP sədrinin müavini Fuad Qəhrəmanlı isə quruna üzv olmaq üçün ərizə ilə müraciət edilməsinin vacibliyini vurğulayıblar.

“Qarabağ” blokunun həmtəsisçisi, ADP sədri Sərdar Cəlaloğlu isə İP-ya üzvlüklə bağlı deyilənləri məsuliyyətsiz açıqlamalar adlandırıb: “Bu adamlar heç bilmirlər ki, İctimai Palataya üzvlük necə həyata keçirilir. Orada bir jurnal var. Adını həmin jurnala yazdırandan sonra olursan, bu qurumun üzvü... Kiməsə müraciət etməyə ehtiyac yoxdur. Digər tərəfdən isə siyasi etika var. Partiya sədrlərinin siyasi müstəvidə yer dəyişməsinin ciddi siyasi nəticələri olduğuna görə, onları adi adamlar kimi “gəl adını yaz, sonra üzv ol” şəklində hansısa quruma qəbul etmirlər. Bunu birdəfəlik bilmək lazımdır”.

ADP sədri deyib ki, İP-də təmsil olunan partiya liderləri birmənalı şəkildə İqbal Ağazadənin bu quruma daxil olmasına razı deyillər: “İqbal Ağazadə ilə müttəfiq olduğuma görə, mən də İctimai Palatanın işində iştirak etmirəm”.

S. Cəlaloğlu bildirib ki, İ. Ağazadənin qarşısında mandatdan imtinaya dair şərtin qoyulması isə məsələyə ikili standartlarla yanaşmadan irəli gəlir: “Maraqlıdır, Müsavat Partiyası 2005-ci ildə parlamentdə olanda “Azadlıq” blokundan qovulmağa da razı oldu, hətta Avropa Şurasında parlament seçkilərinin nəticələri ilə bağlı geniş müzakirələrin başlanmasına da imkan vermədi. Sonra bunu Azərbaycan xalqı qarşısında tarixi xidmət kimi təqdim etdi. Bu gün İqbal Ağazadə yeganə müxalifətçidir ki, parlamentdə təmsil olunur. Bunu təqdir etmək əvəzinə, deyirlər ki, biz yoxuqsa, oradan çıxmalısan. Bu cür ikili standartlarla özümüzü demokrat kimi cəmiyyətə nə təqdim edə bilərik, nə də görəcəyimiz işdən nəticə əldə edilə bilər. Ona görə də bu barədə onların danışıqlarını mənasız hesab edirəm. İctimai Palatanı kimlərsə monopoliyasına alıb və öz sözü olan şəxslərin bu quruma daxil olmasına qısqanclıqla yanaşırlar”.

Məsələyə İ. Ağazadənin münasibətini öyrənmək mümkün olmayıb.

İP