Daxili siyasət

Ana səhifə

Daxili siyasət

İctimai Palatanın 2 aprel aksiyası Milli Məclisdə müzakirə olunub

08 aprel 2011 10:43 (UTC +04:00)

Bakı. Rəşad Süleymanov – APA. Milli Məclisin (MM) iclasında İctimai Palatanın aprelin 2-də keçirdiyi aksiya müzakirə mövzusu olub. APA-nın məlumatına görə, iclasda cari məsələlərin müzakirəsi zamanı deputat Zahid Oruc bildirib ki, 2 aprel aksiyası dini və siyasi radikalların birgə təşkil etdiyi tədbir olub. Bu gün bəzi qüvvələrin din ixrac etdiyini deyən Z. Oruc müxalifəti qanunlara riayət etməyə çağırıb.

Deputat Aydın Mirzəzadə isə deyib ki, aksiyalarda diqqəti cəlb edən əsas məsələ müxalifətin xaricə səslənməsi və səfirliklərdən dəstək gəlməsi olub: “Bu gün bir qrup insan var ki, Azərbaycanın əleyhinə addımlar ata bilər”. Deputat Fazil Mustafa isə aksiyalardan sonra baş verənlərə diqqət çəkib: “Aksiya iştirakçılarının ailələrini prosesə qarışdırmaq düzgün deyil. Ayrı-ayrı şəxslərin evlərinin qarşısında piket keçirməyə ehtiyac yoxdur. Hər kəs fərdi qaydada məsuliyyət daşıyır. Bir şəxsə görə, ailədəki digər şəxslərin incidilməsi yaxşı nəticə verməz”.

Deputat İqbal Ağazadə isə paytaxt rəhbərliyini aksiya üçün normal yer verməməkdə ittiham edib: “Bakının 11 rayonunda aksiya üçün yerlərin olmasına baxmayaraq, şəhər icra hakimiyyəti qanunları pozaraq şəhərdən kənarda Bibiheybət qəsəbəsindəki stadionunu göstərir. Bəzi qüvvələr Cəlilabadda bir məktəblinin digərini öldürməsini siyasiləşdirməyə çalışır. Onda belə çıxır ki, polis Hacı Məmmədovun evinin qarşısında gündə piket keçirməli idi”.

Sabir Rüstəmxanlı mitinq keçirilməsini insanların konstitusion haqqı olduğunu deyib: “Əgər radikal müxalifətin gücü yoxdursa, 200-300 adam yığırsa, niyə qorxursunuz? Mitinqə çıxan gənclərin çoxu xaricə təhsil alan gənclərdir. Amma burada iş tapa bilmirlər”. Deputat aksiyaların parlamentdə müzakirəsinə gərək olmadığını vurğulayıb.

Milli Məclisin sədr müavini Bahar Muradova isə mitinqin qanunsuz keçirildiyini diqqətə çatdırıb: “Qanuni keçirilsəydi, parlamentdə müzakirə etməzdik. Kimsə insanların əmlakına ziyan vuracaqsa, ona mitinq adı vermək olmaz”.

Milli Məclisin sədri Oqtay Əsədov bildirib ki, müxalifətin 2 aprel aksiyasından sonra beynəlxalq televiziya kanallarında Azərbaycanda guya baş tutmuş mitinq müzakirəyə çıxarılıb: “İstər-istəməz yadıma Sumqayıt hadisələri düşür. Vaxtı ilə SSRİ-nin xüsusi xidmət orqanları tərəfindən təşkil olunmuş Sumqayıt hadisələri Azərbaycanı dünyada pis sifətdə göstərmək üçün Londonun bütün xəbərlərində verildi. Yəni bu, qurulmuş ssenari idi”.

O. Əsədov qeyd edib ki, Azərbaycanı dünyada gözdən salmaq istəyən qüvvələr eyni ssenarini aprelin 2-də etdilər: “200-300 insan yığıldı. Onların əsas məqsədi pozuculuq xarakteri daşıyır. Məqsəd odur ki, telekanallar çəksin, xarici efirlərdə göstərilsin və buna ad qoyulsun. Mən ad çəkmək istəmirəm, həmin gün aksiyada tanıdığımız insanlar da var idi. Sakitcə getdiyi yerdə birdən kamera gördükdə “Azadlıq” qışqırmağa başlayırdı. Aydındır ki, bu, təşkil olunmuş ssenari idi. Mən inanmıram ki, belə bir biabırçı mitinqdən sonra yenidən mitinq keçirmək istəsinlər, buna ürək eləsinlər”.

MM-in sədri vurğulayıb ki, Azərbaycan artıq o illərin Azərbaycanı deyil: “Azərbaycan müstəqil, güclü inkişaf eləmiş bir ölkədir. Azərbaycanda belə qarışdırıcı məsələlərə yer yoxdur”.

2_aprel