Daxili siyasət

Ana səhifə

Daxili siyasət

QAT Ali Məclisinin növbəti iclası keçirilib

11 aprel 2011 12:35 (UTC +04:00)

Bakı. Ramil Məmmədli - APA. Qarabağ Azadlıq Təşkilatı (QAT) Ali Məclisinin növbəti iclası keçirilib. QAT mətbuat xidmətindən APA-ya verilən məlumata görə, iclasda təşkilati məsələlərə baxılıb, Ali Məclisə yeni üzvlər seçilib. İclasda prezidentlərin Soçi görüşünə, ATƏT-in Qiymətləndirmə missiyasının hesabatına, ermənilərin Xankəndində aeroport açmaq cəhdlərinə, “xalq diplomatiyası”nın bəzi qüvvələr tərəfindən fəallaşdırılması təşəbbüslərinə və digər məsələlərə də münasibət bildirilib. Ali Məclisdə beynəlxalq vasitəçilərin “xidməti”ndən imtina olunması, Xankəndi aeroportunun açılmasına imkan verilməməsi, havaya qalxacaq təyyarənin dərhal məhv edilməsinin zəruriliyi vurğulanıb.

Müdafiə Nazirliyinin rəhbərliyində ciddi kadr dəyişikliklərinə ehtiyac olduğu qeyd olunub, o cümlədən gənclər, xüsusilə də ali və orta məktəb tələbələri arasında hərbi vətənpərvərlik işinin gücləndirilməsi üçün bir sıra konkret tədbirlərin həyata keçirilməsinə dair qərar qəbul olunub.

Qurum Şuşanın işğal gününün “İşğalçılara nifrət günü” kimi qeyd olunması ilə bağlı da qərar qəbul edib və həmin gün - mayın 8-də Bakıda və bölgələrdə etiraz aksiyalarının keçirilməsi nəzərdə tutulub. Ali Məclis mayın 8-dən sonra, ümumiyyətlə, davamlı aksiyaların keçirilməsi haqda da qərar qəbul edib. Bu aksiyalarda BMT-dən işğalçı Ermənistana qarşı sanksiyalar tətbiq etmək, Rusiyadan Ermənistandakı hərbi bazalarını çıxarmaq, ABŞ-dan işğalçı Ermənistana və Dağlıq Qarabağdakı qondarma rejimə yardımlara son qoymaq, Azərbaycan hakimiyyətindən isə dərhal hərbi əməliyyatlara başlamaq tələb olunacaq.