Daxili siyasət

Ana səhifə

Daxili siyasət

BAXCP İdarə Heyətinin iclası keçirilib

11 aprel 2011 14:13 (UTC +04:00)

Bakı – APA. Bütöv Azərbaycan Xalq Cəbhəsi Partiyası (BAXCP) İdarə Heyətinin növbəti iclası keçirilib. BAXCP mətbuat xidmətindən APA-ya verilən məlumata görə, iclasda qərarların icrası, ictimai-siyasi vəziyyət və cari məsələlər müzakirə olunub.

Ölkədəki ictimai-siyasi vəziyyəti müzakirəsi zamanı qeyd olunub ki, ərəb ölkələrindəki qanlı inqilablardan ruhlanan bəzi barışmaz müxalifət partiyaları Azərbaycandakı real vəziyyəti nəzərə almadan xarici ölkələrin də təhriki ilə qarşıdurmalara səbəb ola biləcək icazəsiz aksiyalar keçirməkdə qərarlı görünürlər: “BAXCP ölkə ictimaiyyətinə bildirir ki, xarici ölkələrin məqsədi heç də iddia olunduğu kimi, qanunun aliliyinə söykənən azad cəmiyyət quruculuğu deyil. Erməni diasporu qarşısında öhdəlik götürmüş bəzi superdövlət başçıları Azərbaycan hökumətini daxili sabitliyi pozmaqla təhdid edərək Qarabağın statusunu müəyyənləşdirmək, ölkə Konstitusiyasına zidd olaraq Dağlıq Qarabağda referendum keçirilməsinə, o cümlədən Türkiyə ilə Ermənistan arasında sərhədlərin açılmasına mane olmamağa razı salmaq niyyəti güdürlər. BAXCP əminliklə bəyan edir ki, xarici güclər bu istəklərinə nail olarlarsa, yaxın keçmişdə olduğu kimi, özləri hakimiyyəti daha qətiyyətli olmağa və insanları küçələrdən yığışdırmağa çağıracaqlar. Biz hər bir vətəndaşımızın sərbəst toplaşmaq hüququnu tanıyır və iqtidarı da bu hüquqları tanımağa dəvət edirik. Biz iqtidarı həbsləri dayandırmağa, ölkədə siyasi sistemin gücləndirilməsi üçün siyasi partiyaların rolunun artırılması istiqamətində islahatlar həyata keçirməyə çağırırıq.
Biz diplomatik korpusu məkrli siyasətdən imtina etməyə, Azərbaycan xalqının taleyi ilə oynamamağa və bütün siyasi qüvvələrlə səlahiyyətləri çərçivəsində əməkdaşlıq etməyə, qarışdırıcılıq fəaliyyətlərinə son qoymağa, barışmaz müxalifəti isə xalq qarşısında öz məsuliyyətini dərk etməyə, xarici güclərin əlində alət olmamağa çağırırıq".

BAXCP İdarə Heyətində müzakirə olunan digər məsələ, ABŞ-da “Qurani-Kərim”in yandırılması ilə bağlı olub. Bununla əlaqədar bəyanat qəbul olunub.