Daxili siyasət

Ana səhifə

Daxili siyasət

“Psixiatriya haqqında” qanuna əlavə və dəyişikliklər ediləcək

12 aprel 2011 09:25 (UTC +04:00)

Bakı. Rəşad Süleymanov – APA. Azərbaycanda “Psixiatriya haqqında” qanuna əlavə və dəyişikliklər ediləcək. Bu barədə APA-ya Milli Məclisin Sosial siyasət komitəsinin sədr müavini Musa Quliyev məlumat verib.

Millət vəkilinin sözlərinə görə, artıq əlavə və dəyişikliklər layihəsi rəy alınması üçün Səhiyyə və Ədliyyə nazirliklərinə göndərilib. Qanuna ümumilikdə 20-yə yaxın əlavə və dəyişikliklər təklif olunub. Deputat bildirib ki, əlavə və dəyişikliklər psixiatrik xəstəyə diaqnozun qoyulması, xəstənin saxlanılması, hüquqlarının qorunması sahələrində mövcud şəraiti Ümumdünya Səhiyyə Təşkilatının tələblərinə uyğunlaşdırmaq məqsədi güdür: “Bu gün bəzən ruhi xəstəliklərdən repressiya metodu kimi istifadə edirlər. Ruhi xəstə diaqnozu qoyub adamı illərlə xəstəxanada yatırdıb əmlakına, hətta pensiyasına belə sahib olurlar. Əlavə və dəyişikliklər bu kimi neqativ halları aradan qaldıracaq”.

M. Quliyev deyib ki, əlavə və dəyişikliklər qüvvəyə minəndən sonra psixiatrik xəstə diaqnozunu ixtisaslaşmış həkimlər və həkim komissiyaları qoyacaqlar. Xəstə həkimlərin rəyi ilə xəstəxanaya yerləşdirilə biləcək. Bundan sonra xəstəxana bu barədə məhkəməyə məlumat verməlidir. Eyni zamanda xəstə ruhi xəstəxanadan məhkəmənin qərarı ilə deyil, həkimin qərarı ilə çıxarıla biləcək.

Layihədə dispanserlərdə xəstələrə dini ayinlərin icrası üçün şərait yaradılması da əksini tapıb. Digər dəyişiklik isə ondan ibarətdir ki, könüllü müraciət edənlər sərt mühafizə olunan müalicə müəssisələrində deyil, adi rejimli stasionar müəssisələrdə müalicə almaq hüququ əldə edəcəklər.

Milli_Məclis