Daxili siyasət

Ana səhifə

Daxili siyasət

Vidadi İsgəndərov, Tofiq Yaqublu və Mustafa Hacıbəyli 2 aprel mitinqdə saxlanılmaları ilə bağlı mətbuat konfransı keçiriblər

12 aprel 2011 12:00 (UTC +04:00)

Bakı. Ramil Məmmədli - APA. Bu gün hüquq müdafiəçisi Vidadi İsgəndərov, Müsavat Partiyası başqanının müavini Tofiq Yaqublu və jurnalist Mustafa Hacıbəyli İctimai Palatanın aprelin 2-də keçirilən mitinqdə saxlanılmaları ilə bağlı mətbuat konfransı keçiriblər.

APA-nın məlumatına görə, V. İsgəndərov bildirib ki, aprelin 2-də keçirilən mitinq zamanı monitorinq apararkən saxlanılıb və Nəsimi Rayon Polis İdarəsinə aparılıb.

V. İsgəndərov bu idarənin polis rəisinin müavini Süleyman Nemətov tərəfindən döyüldüyünü bildirib. O, 16 saatdan sonra Binəqədidəki Müvəqqəti Saxlanma Məntəqəsinə apardıldığını, məhkəmə prosesində isə 8 sutka müddətinə inzibati qaydada azadlığının məhdudlaşdırıldığını bildirib.

V. İsgəndərov Nəsimi Rayon Polis İdarəsində saxlanılan mitinq iştirakçılarının hamısına qarşı mənəvi və fiziki təzyiq olduğunu iddia edib.

Müsavat Partiyası başqanının müavini Tofiq Yaqublu və jurnalist Mustafa Hacıbəyli də eyni polis idarəsindəki davranışdan şikayət ediblər. Onların sözlərinə görə, zərərçəkən və şahid ifadələri ilə onlara inzibati qaydada cəza verilib.

M. Hacıbəyli deyib ki, ona qarşı baş verənlərlə bağlı Nəsimi Rayon Prokurorluğuna şikayət edib: “Əgər şikayətimə Azərbaycanda baxmasalar və ədalətli qərar çıxarmasalar, İnsan Haqları üzrə Avropa Məhkəməsinə müraciət edəcəyəm”.

Bakı Şəhər Baş Polis İdarəsinin mətbuat xidmətinin rəhbəri Qalib Rəhimov isə APA-ya açıqlamasında mətbuat konfransında səslənən fikirləri polisin fəaliyyətinə qarşı əsassız ittiham adlandırıb. Onun sözlərinə görə, aprelin 2-də keçirilən qanunsuz aksiya zamanı ictimai asayişi pozan şəxslər polis tərəfindən saxlanılıb və bir neçəsi inzibati qaydada cəzalandırılıb: “Bu şəxslər gündəmdə qalmaq üçün bir sıra tədbirlər keçirirlər. Əgər bundan sonra da keçirilən aksiyalar müvafiq icra strukturu ilə razılaşdırılmazsa, polis xidmətə uyğun olaraq, aksiyanın qarşısının alınması üçün zəruri addımlar atacaq”.

2_aprel