Daxili siyasət

Ana səhifə

Daxili siyasət

İctimai Palatanın Koordinasiya Şurasının növbəti iclası keçirilib

12 aprel 2011 13:15 (UTC +04:00)

Bakı. Pərvin Abbasov - APA. Bu gün İctimai Palatanın (İP) Koordinasiya Şurasının (KŞ) iclası keçirilib. KŞ-dən APA-ya verilən məlumata görə, Müsavat Partiyasının başqanı İsa Qəmbərin sədrliyi ilə keçirilən iclasda ölkədəki ictimai-siyasi vəziyyət müzakirə edilib.

KŞ üzvləri aprelin 17-nə təyin olunmuş aksiyanı da müzakirə ediblər. Qeyd olunub ki, Bakı Şəhər İcra hakimiyyəti (BŞİH) mitinqin “Nərimanov” kinoteatrının qarşısında keçirilməsinə icazə verməsə, aksiyanın harada keçiriləcəyi ilə bağlı qərarı İP-nin Mitinq Komitəsi versin.

Bildirilib ki, İP-nin Daxili İşlər Nazirliyi və Respublika baş Prokurorluğuna müraciətindən sonra İP-nin müəyyənləşdirilmiş nümayəndələri Bakı şəhər Baş Polis İdarəsinə (BŞBPİ) çağırılıb, orada BŞBPİ və Bakı şəhər Prokurorluğunun rəhbərliyi ilə görüş keçirilib. Lakin eyni vaxtda BŞİH-ə də analoji müraciət edilməsinə baxmayaraq, bu qurum müraciəti cavabsız qalıb. Qərara alınıb ki, lazım olarsa BŞİH-ə yenidən təkrar müraciət göndərilsin.

İP KŞ üzvləri Müsavat Partiyası Gənclər Təşkilatının sədri Tural Abbaslının təhsil aldığı Bakı Dövlət Universitetindən qovulmasını pisləyib. Qeyd edilib ki, T. Abbaslı və siyasi fəaliyyətinə görə universitetlərdən qovulan digər gənclərin Avropada təhsil almasına yardım göstərilməlidir.

KŞ “Azadlıq” qəzetinə olan son hücumları pisləyən bəyanatın qəbul olunmasını da qərara alıb.

İP