Daxili siyasət

Ana səhifə

Daxili siyasət

Bakıda korrupsiyaya qarşı mübarizə forumu keçirilir - FOTOSESSİYA

Bakıda korrupsiyaya qarşı mübarizə forumu keçirilir - <font color=red>FOTOSESSİYA</font>

15 aprel 2011 09:10 (UTC +04:00)

Bakı. Ramil Məmmədli – APA. Bakıda Azərbaycanın Korrupsiyaya Qarşı Mübarizə üzrə Komissiyasının, Baş Prokurorluğun və Korrupsiya ilə mübarizə aparan QHT-lərin məlumat və əməkdaşlıq şəbəkəsinin təşəbbüsü ilə korrupsiyaya qarşı mübarizə forumu keçirilir. APA-nın məlumatına görə, Korrupsiya ilə mübarizə aparan QHT-lərin məlumat və əməkdaşlıq şəbəkəsinin koordinatoru Əliməmməd Nuriyev prezident İlham Əliyev tərəfindən korrupsiyaya qarşı mübarizənin vacibliyinin vurğulandığını və artıq korrupsiya hallarının qarşısının alınması üçün müəyyən işlər görüldüyünü deyib: “Forum vətəndaş cəmiyyəti qarşısında mühüm vəzifələr qoyur. Fikrimcə, Baş Prokurorluğun müvafiq idarəsi ilə Korrupsiya ilə mübarizə aparan QHT-lərin məlumat və əməkdaşlıq şəbəkəsi arasında Memorandum imzalanmalıdır”.

Prezident Administrasiyasının Hüquq-mühafizə orqanları ilə iş şöbəsinin müdiri, Korrupsiyaya Qarşı Mübarizə üzrə Komissiyanın üzvü Fuad Ələsgərov bildirib ki, korrupsiya ilə mübarizədə sıx əməkdaşlıq və daimi format olmalıdır: “Bu məqsədə çatmaq, iqtisadiyyatın davamlı inkişafını təmin etmək məqsədilə bir çox vəzifələr, o cümlədən makroiqtisadi sabitliyin qorunması, sağlam rəqabətin gücləndirilməsi, inhisarçılığın qarşısının alınması, vergilər bazasının genişləndirilməsi, investisiya proqramlarının və investisiya yönümlü siyasətin davam etdirilməsi üçün tədbirlər müəyyən edilib. Korrupsiyanı doğuran səbəblər müxtəlifdir. Burada iqtisadi, institusional, sosial, mədəni faktorlar xüsusi seçilir”.

F. Ələsgərov DİN-in Yol Patrul Xidməti və Dövlət Gömrük Komitəsinin fəaliyyəti ilə əlaqədar fərmanlardan irəli gələn addımlar haqda da danışıb: “Fərmanlara əsasən bu qurumlarda çalışan şəxslərin sosial müdafiəsini gücləndirmək məqsədilə bu orqanlar tərəfindən toplanan cərimələrdən daxil olan vəsaitin 25 faizi həmin orqanların əməkdaşlarının aylıq vəzifə maaşlarına əlavənin verilməsi üçün istifadə olunacaq. Bundan sonra cərimələr bank və plastik kartlar vasitəsilə ödəniləcək. Bu sistem yaxın vaxtlarda miqrasiya xidmətində də tətbiq olunacaq”.

Baş prokuror, Korrupsiyaya qarşı mübarizə üzrə Komissiyanın üzvü Zakir Qaralov QHT-lərlə səmərəli əlaqələrin qurulmasında maraqlı olduqlarını söyləyib. Onun sözlərinə görə, korrupsiyaya qarşı mübarizə Azərbaycanda həmişə olub, lakin beynəlxalq standartlara uyğun mübarizə konsepsiyasına 2003-cü ildən başlanıb. Z. Qaralov qeyd edib ki, görülən tədbirlər nəticəsində cinayətlərin qarşısının alınmasına nail olunur: “Baş Prokurorluğun Korrupsiyaya Qarşı Mübarizə İdarəsində struktur islahatları həyata keçiriləcək”.

ATƏT-in Bakı ofisinin rəhbəri Əli Bilgə Cankorel “Korrupsiyaya qarşı mübarizədə beynəlxalq əməkdaşlıq” mövzusunda çıxış edib. O bəyan edib ki, korrupsiya deyilən virus cəmiyyətin demokratikləşməsini zəiflədən, iqtisadiyyatı məhv edən bəladır: “Azərbaycanda bu istiqamətdə işlərin görülməsi, qanunvericilik bazasının hazırlanması böyük və önəmli addımların bir hissəsidir. Mübarizə çərçivəsində hüququn aliliyini öndə tutmaq daha vacibdir. Bu, dünya təcrübəsindən irəli gəlir. Başqa ölkələrin təcrübələrindən də bəhrələnmək olar”.

Avropa İttifaqının Azərbaycandakı səfiri Roland Kobia “Avrointeqrasiya prosesində korrupsiyaya qarşı mübarizənin əhəmiyyəti” mövzusunda çıxışında korrupsiyanın dövlət və cəmiyyətin inkişafına qarşı neqativ təsirindən danışıb: “Korrupsiya ictimai narazılığı artırır, qanunun aliliyini zəiflədir və bütün sistem əziyyət çəkir, cəmiyyətin sarsılmasına gətirib çıxarır. Gəlirin aşağı olması da korrupsiyaya səbəb olur”.

Korrupsiya ilə mübarizənin yolları haqda danışan R. Kobia deyib ki, Azərbaycanın bu problemlə mübarizə aparmaq üçün bütün imkanlar var: “Cəmiyyət korrupsiyaya qarşı mübarizədə dövlətə kömək etməlidir. Azərbaycanın Avropa İttifaqı qarşısında götürdüyü öhdəliklərin arasında da korrupsiya ilə mübarizə yer alıb. Əgər Azərbaycan maraqlıdırsa, biz hökumətə korrupsiya əleyhinə proqramın hazırlanmasında və layihələrin həyata keçirilməsində kömək edə bilərik. Biz Azərbaycanın sabit və uğurlu ölkə kimi görmək istəyirik”.

Forum davam edir.

korrupsiya_forum