Daxili siyasət

Ana səhifə

Daxili siyasət

Prezident Yanında QHT-lərə Dövlət Dəstəyi Şurası korrupsiya ilə mübarizə sahəsində 5 istiqamət üzrə müsabiqə elan edəcək

15 aprel 2011 11:19 (UTC +04:00)

Bakı. Ramil Məmmədli – APA. Azərbaycan Respublikasının Korrupsiyaya Qarşı Mübarizə üzrə Komissiyasının, Baş Prokurorluğun və Korrupsiya ilə mübarizə aparan QHT-lərin məlumat və əməkdaşlıq şəbəkəsinin təşəbbüsü ilə keçirilən korrupsiyaya qarşı mübarizə üzrə forum fasilədən sonra davam edib. APA-nın məlumatına görə, “Şəffaflıq Azərbaycan” təşkilatının icraçı direktoru Rəna Səfərəliyeva “Korrupsiya ilə mübarizədə vətəndaş cəmiyyəti institutlarının rolu” mövzusunda çıxışında hökumət qurumlarında korrupsiya ilə mübarizəni səmərəli aparmaq üçün ayrı-ayrılıqda şəbəkələrin yaradılmasını təklif edib və institusional dəyişikliklərə ehtiyac olduğunu söyləyib.

Prezident Yanında QHT-lərə Dövlət Dəstəyi Şurasının sədri Azay Quliyev şuranın korrupsiyaya qarşı mübarizə sahəsində dəstəklədiyi layihələrlə bağlı deyib ki, qurumun yaradıldığı ilk ildə - 2008-ci ildə 3, 2009-cu ildə 7 layihə maliyyələşdirilib, 2010-cu ildə isə “Antikorrupsiya ekspertizası haqqında” qanun layihəsi şura tərəfindən dəstəklənib və maliyyələşdirilib: “Son 3 ildə 18 layihə dəstəklənib. 7368 nəfər layihədə bu və ya digər səviyyədə iştirak edib”.

A. Quliyev 2011-ci ildə də korrupsiyaya qarşı mübarizə ilə bağlı əhəmiyyətli layihələrin dəstəkləndiyini və şuranın bu istiqamət üzrə vətəndaş cəmiyyətinə yardım edəcəyini vurğulayıb: “Şuranın aprelin 12-də keçirilən iclasında qərara aldıq ki, QHT-lərin korrupsiya ilə mübarizədə fəal iştirakı üçün ayrıca 5 istiqamət üzrə müsabiqə elan edək”.

İctimai Televiziyanın baş direktoru İsmayıl Ömərov “Korrupsiyaya qarşı mübarizə ilə əlaqədar İTV-də həyata keçirilən layihənin təqdimatı” mövzusunda çıxış edib. O bildirib ki, İTV-də “Korrupsiya – YOX” adlı veriliş efirə çıxacaq: “Proqram canlı yayımlanacaq. Aidiyyəti qurumların birinci şəxslərinin verilişdə iştirakı təmin olacaq”.

Korrupsiyaya Qarşı Mübarizə üzrə Komissiyanın katibliyinin rəhbəri İnam Kərimov bəyan edib ki, bu sahədə əsas işlərdən biri də hüquq klinikalarının yaradılmasıdır və bu istiqamət üzrə addımların atılmasına başlanıb: “Çalışırıq ki, öz fəaliyyətimizlə həyata keçirilən layihələrə dəstək verək. Məsələn, www.rusum.az saytı yaradılıb. Bu internet səhifəsində dövlət orqanlarındakı rüsumların miqdarı açıq şəkildə vətəndaşların diqqətinə çatdırılıb. Digər mühüm layihə isə korrupsiyaya qarşı mübarizə sahəsində fəaliyyət göstərən QHT-lərlə birgə həyata keçiriləcək. Bu layihə çərçivəsində www.muraciet.az internet səhifəsi yaradılacaq”.

Vətəndaşların Əmək Hüquqlarının Müdafiə Liqasının sədri Sahib Məmmədovun fikrincə, süründürməçiliyə yol açan normativ aktların korrupsion ekspertizası həyata keçirilməli, hökumət qurumlarının “qaynar xət”lərinin işlək mexanizmində operativlik artırılmalıdır.

Sahibkarlığın və Bazar İqtisadiyyatının İnkişafına Yardım Fondunun sədri Sabit Bağırov hesab edir ki, proseduraların sadələşdirilməsinə ehtiyac var: “Vətəndaşlarla əlaqələr intensivləşdirilməlidir. Məvaciblər ən azı iki dəfə artırılmalıdır”.

Müzakirələrin sonunda Korrupsiyaya qarşı mübarizə üzrə QHT-lərin məlumat və əməkdaşlıq şəbəkəsinin bəyanatı qəbul olunub. Bəyanatda bildirilir ki, korrupsiyaya qarşı mübarizə Azərbaycan prezidentinin bəyan etdiyi kimi davamlı, ardıcıl olmalı, bütün sahələri əhatə edən kompleks tədbirlərin həyata keçirilməsini ehtiva etməlidir. Bu zaman vətəndaş cəmiyyəti institutları ilə sıx əməkdaşlıq edilməli, qanunun aliliyi prinsipi rəhbər tutulmalıdır.

Korrupsiya_forum