Daxili siyasət

Ana səhifə

Daxili siyasət

Sabir Rüstəmxanlının “Difai fədailəri” kitabının təqdimatı keçirilib - FOTO

Sabir Rüstəmxanlının “Difai fədailəri” kitabının təqdimatı keçirilib - <font color=red>FOTO</font>

20 aprel 2011 10:18 (UTC +04:00)

Bakı. Ramil Məmmədli – APA. Qarabağ İctimai Forumunun təşkilatçılığı ilə Sabir Rüstəmxanlının “Difai fədailəri” kitabının təqdimatı keçirilib. APA-nın məlumatına görə, Qarabağ İctimai Forumunun sədri Umud Rəhimoğlu deyib ki, kitab Azərbaycan tarixinin çox önəmli və şərəfli səhifələrindən birinə - 1905-1907-ci illərdə Azərbaycanda, eləcə də Cənubi Qafqazda baş verən hadisələrə işıq salıb: “Kitaba vaxt ayırmağa və oxuyub düşünməyə dəyər”.

Milli Məclisin üzvü Qənirə Paşayeva Azərbaycan xalqının azadlığı və dövlət müstəqilliyi uğrunda mübarizə aparan ictimai-siyasi xadimlərin ölkədə yaxşı tanınmadığını və təbliğ olunmadığını söyləyib: “Difai təşkilatının fəaliyyəti olmasaydı, bəlkə faciələrimiz daha çox olardı. Bu insanlar millətin təmənnasız fədailəri olublar. Kitab tariximizin qaranlıq səhifələrinə işıq saçıb”. Q. Paşayeva bu kimi kitabların böyük tirajla çap olunaraq yayılmasına ehtiyac olduğunu vurğulayıb.

Tarixçi-alim Cəmil Həsənli kitabın müəllifi S. Rüstəmxanlının hər bir əsərinin ictimai fikrin formalaşmasında böyük rol oynadığına, Milli Məclisin üzvü Fazil Mustafa isə kitabın gənclər arasında yayılmasının zəruriliyinə diqqət çəkib.

Kitabı və nəşrdə yer alan tarixi prosesləri təhlil edən şair Ramiz Rövşən ötən əsrdə Azərbaycan ədəbiyyatının keçdiyi yoldan danışıb. R. Rövşən müəllifin yaradıcılığını da təhlil edib: “Özünü tanımayan şəxs millətini tanıya bilməz. Fikrimcə, bu kitab həmin xəttin üstündədir”.

Təqdimatda Azərbaycanın Milli Qəhrəmanı Şirin Mirzəyevin həyat yoldaşı, Milli Məclisin deputatı Flora Qasımova, Azərbaycan Milli Elmlər Akademiyasının müxbir üzvü Hətəm Quliyev və digərləri kitab və “Difai”nin fəaliyyət göstərdiyi dövrün tarixi prosesləri haqda danışıblar.