Daxili siyasət

Ana səhifə

Daxili siyasət

Qənirə Paşayeva Türkiyə Əsassız Erməni İddialarıyla Mücadilə Dərnəyinin rəhbəri ilə görüşüb

28 aprel 2011 12:11 (UTC +04:00)

Bakı – APA. Millət vəkili Qənirə Paşayeva Türkiyənin İğdır vilayətində fəaliyyət göstərən Əsassız Erməni İddialarıyla Mücadilə Dərnəyi (ASİM-DER) İdarə Heyətinin sədri Göksəl Gülbəylə görüşüb. APA-nın xəbərinə görə, görüşdə “erməni soyqırımı” yalanlarının ifşa olunması ilə bağlı ictimai birliklərin üzərinə düşən vəzifələr və ASİM-DER-in bu günədək gerçəkləşdirdiyi işlər barədə fikir mübadiləsi aparılıb.

Q. Paşayeva istər uydurma “erməni soyqırımı” ilə bağlı, istərsə də ermənilərin XX yüzilliyin əvvəllərində Türkiyənin şimal-qərbində, eləcə də 1918-ci ilin mart ayında Bakıda, Şamaxıda, Qubada, əsrin sonunda – 26 fevral 1992-ci ildə isə Xocalıda törətdiyi əsl soyqırım aktları, bu həqiqətlərin dünya ictimaiyyətinə çatdırılması üçün görülməsi mümkün tədbirlər barədə öz fikir və mülahizələrini bölüşüb. Bu mövzuda bir neçə kitab və sənədli film müəllifi olduğunu xatırladan millət vəkili həqiqətlərimizin nəinki xarici ölkələrdə, beynəlxalq təşkilatlarda lazımi qədər bilinmədiyini, bəzən qardaş ölkələrin bir çox vətəndaşlarının belə bu həqiqətlərə vaqif olmadığını vurğulayıb.

G. Gülbəy isə indiyədək gerçəkləşdirdikləri işlər barədə məlumatların əks olunduğu qovluğu millət vəkilinə təqdim edərək təmsil etdiyi dərnəyin planlaşdırdığı yeni layihələr barədə məlumat verib. O, Q. Paşayevanı Azərbaycan Xalq Cümhuriyyətinin elan olunduğu 28 may günü ərəfəsində, habelə Azərbaycanın öz dövlət müstəqilliyini bərpa etməsinin 20-ci ildönümü ilə bağlı tədbirlər keçirmək təklifini məmnuniyyətlə dəyərləndirəcəklərini söyləyib.