Daxili siyasət

Ana səhifə

Daxili siyasət

Mübariz Əhmədoğlu: “Ölkələrinin daxili vəziyyətini unudan İran rəhbərləri Ermənistana antiazərbaycan mahiyyətli yardım etməkdə yarışırlar”

04 may 2011 07:55 (UTC +04:00)

Bakı-APA. “İran-Ermənistan münasibətlərində uzun illərdən bəri baş verənlərə və son vaxtlar bu proseslərdə üzə çıxan yeni elementlərə söykənərək İranın Ermənistandan asılılığı ehtimalını irəli sürmək olar”. APA-nın məlumatına görə, bu fikirlər Siyasi İnnovasiyalar və Texnologiyalar Mərkəzinin rəhbəri, politoloq Mübariz Əhmədoğluna məxsusdur. O, qeyd olunan asılılığı daha çox alkaloid asılılığı ilə müqayisə edib: “Ermənistanın İranın bu qədər yaxşılığının əvəzində atdığı addımlar yuxarıdakı ehtimalı daha da möhkəmləndirir:
a) İranla bağlı, o cümlədən İranın daxili həyatında baş verənlər haqqında neqativ informasiyaların yayılmasında erməni mətbuatı Mərkəzi Asiya da daxil olmaqla region mətbuatı içərisində liderdir;
b) Ermənilər İranın antixristian imicini yaradıblar və indi bu imici möhkəmləndirməklə məşğuldurlar;
c) Ermənilər İranın daxilində müxtəlif təxribatlarla məşğul olmaqda davam edirlər;
ç) İranın yaratdığı konsorsiumları Rusiyaya satıb.
d)Ermənistan Oşakan şəhərində İranın tarixini ələ salan abidə qoyub.
İran-Ermənistan münasibətlərinin özəlliklərindən biri də budur ki, İranda çörəyin və zəruri məhsulların qiymətinin artmasına, əhalinin sosial vəziyyətinin pisləşməsinə baxmayaraq İrandan Ermənistana gələn yardımın və dəstəyin miqdarı artır”.

Politoloq hesab edir ki, Ermənistanın antiirançılığı artdıqca İranda ermənipərəstlik güclənir: “İranın Ermənistana yardımlarının bir qismi aşağıdakılardır:
a)İqtisadi yardımlarını artırır. Ermənistan rəsmilərinin verdiyi məlumata görə, Novruz şənlikləri vaxtı İran turistləri Ermənistanda 40 milyona dollara yaxın pul xərcləyiblər. Ermənilər bu rəqəmi 20 milyon dollar proqnozlaşdırmışdılar;
b)Ermənistan üçün 4 milyard dollarlıq kommunikasiya xətti çəkmək niyyətindədir;
c)Dağlıq Qarabağ münaqişəsində vasitəçilik missiyasını qulaq ardına vurmuş Ermənistana heç bir irad bildirmir;
ç) Yeni konsorsium yaratmaq niyyətindədir, Araz çayı üzərində Ermənistan üçün 2 ədəd SES tikmək qərarını verib, Ermənistan isə özündə olan su elektrik stansiyalarını Rusiyaya bağışlamaq istəyir.
d) “Qaz əvəzinə elektrik enerjisi” proqramını reallaşdırır. Bu proqramın reallaşmasından Ermənistanın qazancı 200 milyon dollardır;
e) İran Ermənistana hərbi yardımını leqallaşdırır və artırır”.

Mübariz Əhmədoğlunun fikrincə, İranın rəhbərləri Ermənistana antiazərbaycan mahiyyətli yardım etməkdə yarışa giriblər: “Prezident yerində olmayanda ali dini lider Ermənistanla əlaqəni ön plana keçirir və Ermənistanı dünya okeanına çıxaran koridor barədə qərar qəbul edir. Prezident isə fəaliyyətə başlayan kimi işdə olmadığı dövrdə məşğul ola bilmədiyi işləri, o cümlədən ölkənin ağır sosial-iqtisadi məsələlərini bir qırağa qoyur və ilk olaraq Ermənistana köməklə maraqlanır. Müdafiə nazirinin müavinini ora göndərdi. Ola bilər, İranın prezidenti dini lideri sığortalamaq üçün bu addımı atıb. İranın bu addımı bizim üçün gözlənilməz deyildi. Amma bu addımı atmaqla İranın nə qazandığını yaxın zaman göstərəcək”.