Daxili siyasət

Ana səhifə

Daxili siyasət

Əli Əhmədov: “Azərbaycan hökuməti müxalifəti kütləvi aksiyaların keçirilməsi üçün lazımi şəraitlə təmin edib”

06 may 2011 09:15 (UTC +04:00)

Bakı. Ramil Məmmədli-APA. “Azərbaycan hökuməti müxalifəti kütləvi aksiyaların keçirilməsi üçün lazımi şəraitlə təmin edib. Bununla əlaqədar hansısa beynəlxalq təşkilatın hökumətlə danışıqlar aparmasına ehtiyac duyulmur”.

Bu açıqlamanı APA-ya Yeni Azərbaycan Partiyasının (YAP) sədr müavini, partiyanın icra katibi Əli Əhmədov verib. İctimai Palatanın (İP) kütləvi aksiyalar keçirməklə bağlı beynəlxalq təşkilatlarla müraciət etməsini şərh edən Əli Əhmədov bildirib ki, məsələnin qoyuluşu prinsip etibarilə düzgün deyil: “Ən azından ona görə ki, Azərbaycan qanunvericiliyində kütləvi aksiyaların keçirilməsinin hüququ bazası yaradılıb. Ayrı-ayrı müxalifət partiyaları guya Azərbaycanda aksiyaların keçirilməsi üçün şərait yoxdur deyə, məsələ qaldırmaq istəyir. Lakin beynəlxalq təşkilatların nümayəndələri Azərbaycanda reallığı və gerçəkliyi öyrənərək, həqiqətin müxalifət təmsilçilərinin səsləndirdiyi kimi olmadığının şahidi olur”.

Ə. Əhmədov qeyd edib ki, İctimai Palata deyilən qurumun kütləvi aksiyalarla bağlı istək və arzuları real gücləri ilə üst-üstə düşmür: “Onlar ürəklərində hər həftənin sonunda kütləvi aksiya keçirmək istəyirlər. Amma aksiyanı keçirmək üçün istəklə yanaşı, bu aksiyada iştirak etməyi arzulayan adamlar da olmalıdırlar. Həqiqət isə bundan ibarətdir ki, İctimai Palatada təmsil olunanların istək və arzularına baxmayaraq, onların təşkil etdiyi kütləvi aksiyalarda iştirak etmək istəyən vətəndaş yoxdur”.