Daxili siyasət

Ana səhifə

Daxili siyasət

Əli Məsimli: “Bazarlarda süni qiymət artımı mütəşəkkil cinayətkarlığın bir növü kimi qiymətləndirilməlidir”

06 may 2011 10:45 (UTC +04:00)

Bakı. Rəşad Süleymanov-APA. Milli Məclisin bu gün keçirilən iclasında cari məsələlərin müzakirəsi zamanı deputatlar bir sıra təkliflərlə çıxış ediblər. APA-nın məlumatına görə, iclasda çıxış edən deputat Əli Məsimli gözlənilən pensiya və maaş artımının inflyasiyaya səbəb olacağını söyləyib. Deputat bildirib ki, bir neçə ildir pensiya və maaşlar artan kimi bazarda qiymətlər də dərhal artır: «Əmək haqları 20 faiz artacaqsa, malların qiymətini də o qədər qaldıracaqlar. Buna qarşı mübarizə aparmaq, haqsız rəqabətə qarşı müqaviməti gücləndirmək üçün Milli Məclis bu prosesə qoşulmalıdır. Haqsız süni qiymət artımı mütəşəkkil cinayətkarlığın bir növü kimi qiymətləndirilməli və buna yol verənlər cəzalandırılmalıdır. Süni qiymət artımının qarşısının başqa cür almaq mümkün deyil».

Deputat Zahid Oruc isə Üsamə bin Ladenin öldürülməsindən danışıb. Deputat bildirib ki, bu əməliyyatı həyata keçirənlər erməni terrorçularına qarşı da analoji addımlar atmalıdırlar.

Deputat Qüdrət Həsənquliyev isə tələbə qəbulu qaydalarından danışıb: “Bizim qəbul elədiyimiz Konstitusiyada, normativ sənədlərin çox sabit olması nəzərdə tutulsa da bu, tez-tez dəyişilir. Tələbə qəbulu qaydalarına müəyyən düzəlişlər edilməsi buna misaldır. Azərbaycanda heç kimə sirr deyil ki, hər dəfə TQDK sədri Məleykə Abbaszadə bildirir ki, ölkədəki orta məktəblərdə tədris işi yaxşı təşkil olunmayıb. Buna görə də ildən-ilə test sualları çətinləşdirilir. Baxmayaraq ki, Azərbaycanda orta təhsil pulsuzdur, gəlin yoxlayaq görək neçə faiz tələbə repetitorsuz ali məktəblərə qəbul olunur? Bütün orta məktəb şagirdləri repetitor yanına gedir və nəticədə ali məktəblərə qəbul imtahanlarında riyaziyyat və digər fənlərlə bağlı suallara cavab verə bilmirlər. Çünki çalışırlar ki, yalnız imtahan verdikləri fənləri öyrənsinlər. Təhsil Nazirliyi orta məktəblərdə orta səviyyədə test sualları müəyyənləşdirməlidir. Hesab edirəm ki, biz yoxsul və orta təbəqənin taleyini fikirləşməliyik. Repetitor valideynlərin büdcəsinə ciddi ziyan vurur”.

Təhsil məsələləri ilə bağlı çıxış edən millət vəkili Azay Quliyev isə bildirib ki, orta məktəblərdə tədris kifayət qədər mürəkkəbdir və valideynlər buna narazılıqlarını bildirirlər. Bununla bağlı QHT-lər və digərləri tərəfində monitorinq aparıldığını deyən millət vəkili söyləyib ki, bu gün təhsil mövcud kurrikuluma uyğun gəlmir: «Biz yeni təhsil sisteminə keçsək də, qüsurlar göz qabağındadır. Digər məsələ isə dərsliklərin məzmunu və materialların həcmi ilə bağlıdır. Məsələn, Rusiyada I, II siniflərdə altı, Türkiyədə yeddi, Azərbaycanda isə doqquz fənn tədris olunur. Hesab edirəm ki, bizdə bu məsələyə yenidən baxılmalıdır”.

Təhsil barədə çıxışlara spiker Oqtay Əsədov da qoşulub: “Biz sovet təhsil sistemindən birdəfəlik imtina eləmişik. Lakin o sistemdə çox gözəl müsbət məsələlər var idi. Yeni qanun layihələrində mütləq bu məsələlərə baxmaq lazımdır”.

Deputat Sabir Rüstəmxanlı isə çıxışında bildirib ki, deputatların çıxışlarının əhəmiyyəti yoxdur. Əvvəllər cari məsələlər zamanı deyilən iradlar barədə dövlət qurumlarından müəyyən cavab gəldiyini deyən deputat indi ölkədəki ən vacib məsələlərin müzakirəsinə yarım saat vaxt ayrıldığını bildirib: «Problemlərdən danışırıq, stenoqrama düşür, amma heç bir nəticəsi olmr. Belə çıxır ki, biz ancaq ürəyimizi boşaldırıq. Bunun hansısa nəticəsinin olması üçün rəsmi yol düşünülməlidir”.