Daxili siyasət

Ana səhifə

Daxili siyasət

Parlamentdə ARDNŞ ilə Almaniya şirkəti arasında imzalanmış sazişin müzakirəsi zamanı mübahisə yaranıb

06 may 2011 15:31 (UTC +04:00)

APA-nın məlumatına görə, qanun layihəsi barədə məlumat verən parlamentin vitse-spikeri Valeh Ələsgərov bildirib ki, bu yataqlar uzun illərdir istismar olunur, ancaq yataqlardan neft çıxarılması aşağı səviyyədədir. Layihədə xarici investor 75 faiz, ARDNŞ isə 25 faiz paya sahibdir. Müqaviləyə əsasən, 90 gün ərzində yataqlarda neft hasilatı 2009-cu ilin səviyyəsinə çatdırılmalıdır. Bu hal baş verməsə, ARDNŞ müqaviləni pozmaq hüququna sahibdir.

Qanun layihəsinə münasibət bildirən millət vəkili, Bütöv Azərbaycan Xalq Cəbhəsi Partiyasının sədri Qüdrət Həsənquliyev müqavilə bağlanan şirkətin həddən artıq çox paya sahib olmasını düzgün saymayıb. İnternetdə adı çəkilən şirkət haqqında araşdırma aparsa da, heç bir məlumata rast gəlmədiyini deyən millət vəkili şirkəti qeyri-ciddilikdə ittiham edib: “Əlinə bir dəfə mikrofon alan müğənni haqqında internetdə məlumat doludur. Ancaq bu neft şirkəti haqqında bir cümlə də yoxdur. Azərbaycan bu cür tanınmayan şirkətlərlə müqavilə imzalamamalıdır. Tələb edirəm ki, ARDNŞ bu və bunun kimi şirkətlərlə bağlı məlumat versin”.

Millət vəkili Asim Mollazadə də layihənin pay bölgüsü məsələsinə toxunaraq, xarici investorlara verilmiş 75 faizlik payın artıq olduğunu qeyd edib.

Q. Həsənquliyevin fikrlərinə münasibət bildirərən V.Ələsgərov isə deyib ki, bu layihədə mənfəət çox da böyük olmadığı üçün böyük şirkətlər bu yataqları işlətməkdə maraqlı deyil. Ona görə də qismən az tanınan şirkətlə müqavilə imzalanıb.

Millət vəkili Siyavuş Novruzov isə qeyd edib ki, müqaviləni imzalayan ARDNŞ məsələni hərtərəfli şəkildə araşdırıb. Müqavilə ölkə prezidentin imzası ilə müzakirəyə çıxarılıb: “Ona görə də kimsə internetdə şirkətin adını tapa bilmirsə, bu o demək deyil ki, müqavilə və ya müqavilədəki tərəflər məsuliyyət daşımırlar”.

Dövlət Neft Şirkətinin prezidenti Rövnəq Abdullayev bildirib ki, müqavilə tərəfdaşı «Uge-Lanser» şirkəti 2003-cü ildən etibarən Almaniya, Rumıniya, Özbəkistan və Gürcüstanda layihələr həyata keçirib. Bu şirkət və ARDNŞ 2003-cü ildə birgə ekoloji mühəndislik şirkəti də yaradıb: “Bibiheybətdə bu şirkətin iştirakı ilə görülən işlər göz qabağındadır. Biz o şirkətin ekoloji layihələrində təcrübəsi olduğunu nəzərə alaraq bu qərarı vermişik. Bu şirkət milyard dollara yaxın investisiya planları hazırlayıb. Dünyanın böyük bankları qeyri-ciddi adlandırdığınız şirkətlərə milyard dollarlıq kreditlər açır”.