Daxili siyasət

Ana səhifə

Daxili siyasət

“İki sahil” qəzeti Heydər Əliyevin anadan olmasının 88-ci ildönümünə həsr edilmiş “Xüsusi buraxılış” çap edib - FOTO

“İki sahil” qəzeti Heydər Əliyevin anadan olmasının 88-ci ildönümünə həsr edilmiş “Xüsusi buraxılış” çap edib - <font color=red>FOTO</font>

10 may 2011 12:34 (UTC +04:00)

Bakı-APA. «İki sahil» qəzeti Heydər Əliyevin anadan olmasının 88-ci ildönümünə həsr edilmiş «Xüsusi buraxılış» çap edib. APA-nın məlumatına görə, Heydər Əliyevin anadan olmasının 88-ci ildönümü münasibətilə işıq üzü görən 84 səhifəlik xüsusi buraxılış ümummilli liderin rəhbərliyi ilə Azərbaycanın müxtəlif sahələr üzrə qazandığı uğurları əks etdirən maraqlı yazıları, rəngli şəkilləri və yüksək poliqrafik tərtibatı ilə diqqəti cəlb edir. Nəşrin üz qabığında qeyd edilən «... Siz özünüzə tayı-bərabəri olmayan abidə, əsrlər boyu yaşayacaq əbədi abidə yaradıbsınız. Bu abidənin adı Azərbaycandır, tərəqqi edən, yeni, xoşbəxt Azərbaycan» fikri Heydər Əliyevin Azərbaycan dövləti, xalqı qarşısındakı xidmətləri müstəqil dövlətimizin dünəninə, bu gününə və gələcəyinə bələdçilik edən inkaredilməz reallıqdır. Xüsusi buraxılışda ulu öndər Heydər Əliyevin həyat və fəaliyyətinin ayrı-ayrı məqamları, siyasi fəaliyyəti, hakimiyyətdə olduğu illər, Azərbaycanın dövlət müstəqilliyinin bərpası, qorunması və möhkəmləndirilməsi istiqamətində gördüyü işlər, bu uğurların davamlığını təmin etmək üçün 2003-cü il prezident seçkilərində öz namizədliyini geri götürərək xalqa müraciəti, sonrakı dövrlərdə bu etimadın real işlərdə öz əksini tapması xüsusi qeyd edilir.

Qəzetin əməkdaşı Xuraman İsmayılqızının «Heydər Əliyev fenomeni: şəxsi keyfiyyətlər, siyasi təcrübə, ictimai rəğbət» yazısında Heydər Əliyevin 1969-cu ildə ilk dəfə siyasi hakimiyyətə gəldikdən sonra Azərbaycanın sovetlər məkanında dünya şöhrətli, qüdrətli bir dövlət kimi tanınması istiqamətində gördüyü işlər, həyata keçirdiyi tədbirlər geniş təhlil olunur. Yazıda həmçinin Heydər Əliyevin Naxçıvanda yaşadığı illərə xroniki nəzər salınır. Bu uğurlar 1993-2003-cü illərdə görülən işlərə stimul verib.

Qəzetin əməkdaşı Telman Qafarın «Milli məfkurənin formalaşması, iqtisadi inkişaf dövrü» yazısında Heydər Əliyevin Azərbaycanın dövlət müstəqilliyinin qorunmasında və möhkəmlənməsində rolu xüsusi vurğulanır. Yeganə Əliyevanın «Bütün fəaliyyətimi xalqın ümidlərini doğrultmaq işinə həsr edəcəyəm» yazısında isə Heydər Əliyevin 1993-cü ilin oktyabrın 10-da keçirilən andiçmə mərasimində Azərbaycanın uğurlu gələcəyi naminə verdiyi vədlərdən və sonrakı dövrlərdə onların real həyatda öz əksini tapmasından bəhs olunur. “İki sahil” qəzetinin baş redaktoru, əməkdar jurnalist Vüqar Rəhimzadənin «Uğurlu gələcəyə böyük inamla” yazısında Heydər Əliyevin siyasi kursunu uğurla davam etdirən prezident İlham Əliyevin rəhbərliyi altında görülən işlər bir daha oxuculara çatdırılır. Xüsusi buraxılışda digər müəlliflərin də Heydər Əliyevin həyat yoluna, ictimai-siyasi fəaliyyətinə həsr olunmuş yazıları öz əksini tapıb.